Том 1 (XI-XII века)

Се бо по изъгнании еже от манастыря преподобьнааго нашего игумена Стефана и великому Никону игуменьство преимъшю, приспевъшемъ же дьньмъ святааго и великаго поста. И въ 1-вую неделю таковаго въздьрьжания и яко добрыимъ подвижьникомъ потрудивъшемъся въ ту неделю, темьже уставлено бысть преподобьныимь отьцьмь нашимь Феодосиемь, въ пятокъ тоя неделя да бывають имъ хлеби чисти зело, друзии же от нихъ съ медъмь и съ макъмь творени. То же тако повелевъшу Никону по обычаю творити келарю, онъ же преслушанию творя, сълъга, рекый яко «мукы не имамъ на сътворение такыимъ хлебомъ». Нъ обаче Богъ не презьре труда и молитвы преподобьныихъ своихъ, и да пакы не разориться уставленое божьствьныимь Феодосиемь. Се бо по святей литурьгии идущемъ темъ на постьныя ты обеды, се отнюду же бе не начаятися то же, тако ти привезоша возъ таковыихъ хлебъ. Еже видевъше братия прославиша Бога, чюдящеся, како присно Богъ печеться нми, подавая вься имъ, еже на потребу, молитвами преподобьнааго имъ отьца и наставьника Феодосия. Таже по дъвоя дьнью повелевъшю келарю, да по обычаю хлебы братии испекутъ въ муце той, ея же бе преже реклъ «не имамъ», то же пекущиимъ готовящемъ и тесто месящемъ и пакы имъ леющемъ укропъ въ не, и се обретеся ту жаба, якоже той варене быти въ таковей воде и такоже то темъ осквьрьни, иже от преслушания твореное дело. Богу сице извольшю на съблюдение святаго стада, иже и таковъ подвигъ сътворьше въ святую ту неделю, то же да не таковыихъ хлебъ въкусять. Нъ се, яко вражию часть сущю, гадъмь осквьрьни сию Богъ, якоже на показание тому быти. Еже о семь да не зазьрить ми никътоже от васъ, яко сии сьде въписахъ и пресечение слову сътворихъ: се бо сего ради си въписахъ, да разумеете, яко несть лепо намъ ни въ чемь же ослушатися наставьника игумена своего, ведуще, яко аще чьто утаимъ от него, нъ от Бога несть потаено ничьтоже, и тъ имать въскоре мьсть сътворити о немь, егоже постави намъ старейшину и пастуха, яко да вьси послушають его и по повелению его вься сътворимъ.

Обаче же уже на пьрьвое съповедание възвратимъся, яже о блаженемь Феодосии исповедающе.

Се бо приспевъшю неколи праздьнику Усъпения пресвятыя Богородиця, беша же и цьркви творяще праздьникъ въ тъ дьнь, маслу же не сущю древяному въ кандила на вълияние въ тъ дьнь. Помысли строитель цьркъвьный въ семени льнянемь избити масла, и то, вълиявъше въ кандила, въжещи. И въпросивъ о томь блаженаго Феодосия, и оному повелевъшю сътворити тако, якоже помысли. И егда въсхоте лияти въ кандило масло то, и се виде мышь въпадъшю въ не, мьрътву плавающу въ немь. Таче скоро шьдъ, съповеда блаженому, глаголя, яко «съ вьсякыимь утвьрьженеемь бехъ покрылъ съсудъ тъ съ маслъмь, и не веде, откуду вълезе гадъ тъ и утопе». То же блаженый помысли, яко Божие есть съмотрение се. Похуливъ же свое неверьство, глагола тому: «Лепо бы намъ, брате, надежю имети къ Богу уповающе, яко мощьнъ есть подати намъ на потребу, его же хощемъ. А не тако, неверьствовавъше, сътворити, егоже не бе лепо. Нъ иди и пролей масло то на землю. И мало потьрьпимъ, моляще Бога, и тъ имать намъ дати въ сий дьнь до избытька древянаго масла». Таче уже бывъшю году вечерьнюму, и се некъто от богатыихъ принесе къръчагу велику зело, пълъну масла древянааго, юже видевъ, блаженый прослави Бога, яко тъ въскоре услыша молитву ихъ. И тако налияша кандила вься, и избыся его большая часть. И тако сътвориша на утрей дьнь праздьникъ светьлъ святыя Богородиця.