Том 1 (XI-XII века)

А иже преподобьный отьць нашь Феодосий, иже поистине испълъненъ Духа Святааго, темьже и Божия таланта умъноживъ, иже населивъ место множьствъмь чьрьноризьць, иже пусто суще, манастырь славьнъ сътвори. Темьже не хотяше никакоже прилога творити въ немь, нъ бе верою и надежею къ Богу въскланяяся, якоже паче не имети упования имением. Темьже и тако сего ради многашьды хожаше по келиямъ ученикъ своихъ, и аще чьто обрящааше у кого, ли брашьно сънедьно, ли одежею лише уставьныя одежа, или от имения чьто, сия възьмъ, въ пещь въметаше, якоже вражию часть сущю и преслушание греху. И сице же глаголаше имъ: «Несть лепо намъ, братие, мьнихомъ сущемъ и отвьрьгъшемъся мирьскыихъ, събьрание пакы творити имению въ келию свою. Како же можемъ молитву чисту приносити къ Богу, съкровища имению дьрьжаще въ келии своей? О семь слыша Господа рекуща, яко “иде съкровища ваша, ту и сьрьдьця ваша”,[959] и пакы о събирающиихъ: “Безумьне, въ сию нощь душю твою изьму, а яже събьра — кому будуть?”.[960] Темьже, братие, довъльни будемъ о уставьныихъ одежахъ нашихъ и о брашьне предъложенемь на трапезьници от келаря, а въ келии от сицевыихъ не имуще ничьтоже, да тако съ вьсякыимь усьрьдиемь и вьсею мыслию молитву свою чисту приносимъ къ Богу». И се же и ина многа увещавааше я съ вьсякыимь съмерениемь и съ сльзами учаше вься. Не бо николиже бе напраснъ, ни гневьливъ, ни яръ очима, нъ милосьръдъ и тихъ, и милость имея къ вьсемъ. Темьже и аще къто от святааго стада раслабелъ бе сьрьдцьмь, отидяше от манастыря, то же блаженый его ради въ велице печали и скърби будяше и моляся къ Богу, дабы отблудивъшееся овьча от стада его възвратилъ въспять. И такоже по вься дьни пребываше плача и моля Бога его ради, донъдеже братъ тъ възвратяшеся въспять. То же того блаженый съ радостию приимъ учаше и́ никакоже раслабети вражиями къзньми, ни попустити имъ на ся, нъ крепе стати. Се бо глаголааше яко «не мужьскыя есть душа, еже раслабети печальныими сими напастьми». Си и ина многа глаголавъ, утешивъ того, отпустяаше въ келию его съ миръмь.

Бе же ту единъ братъ слабъ сы, иже и часто отбегаше от блаженаго манастыря, и егда пакы приидяше, то же блаженый съ радостию его приимаше, глаголаше бо, яко не имать бо его оставити тако, да кроме манастыря сего съконьчаеться. Се бо аще и многашьды отходя есть от насъ, нъ сь имать въ манастыри семь коньць житию прияти. И моляше съ плачьмь Бога о немь, прося тьрьпения ему. Таче по мноземь исхожении ему, приде единою къ манастырю, моляся великому Феодосию, дабы приятъ былъ. То же, иже поистине милостивый и, яко овьча от заблужения пришьдъшее, тако того съ радостию приятъ и причьте къ стаду своему. Тъгдаже чьрьноризьць тъ, иже бе своима рукама делая, сътяжалъ имения мало, бе бо платьна делая, сия принесъ, предъ блаженыимь положи. То же святый глагола ему: «Аще хощеши чьрноризьць съвьрьшенъ быти, възьмъ сия, яко ослушания дело есть, въвьрьзи въ пещь горущу». Онъ же, иже теплъ сый на веру, несъ, по повелению блаженаго въвьрьже въ пещь, и тако изгоре. Самъ же оттоле живяше въ манастыри томь, прочая дьни своя проводя, и тако ту по проречению блаженаго усъпе съ миръмь. Сицева ти бе любы блаженаго, и сицево милосьрьдие къ ученикомъ своимъ имяше, дабы ни единъ от стада его отлучилъся, нъ вься въкупе, яко пастухъ добрый, пакы пасяше, уча и утешая и словесы увещавая душа ихъ, къръмляше и напаяя не престаяше. Темьже и мъногы на Божий разумъ наводяше и къ небесьному царствию направляше. Нъ се пакы на прокое отселе съповедание отьца нашего Феодосия поидемъ.

Се бо въ единъ от дний приде келарь къ сему блаженому глаголя, яко въ сий дьнь не имамъ, что предъложити на ядь, се бо ни съварити чьто имамъ. Глагола тому блаженый: «Иди, потьрьпи мало, моля Бога, некъли тъ попечеться нами. Аще ли же, то да съваривъше пьшеницу, ти ту, съмятъ съ медъмь, предъставиши на тряпезе братии, да едять. Обаче же надеюся на Бога, иже въ пустыни людьмъ непокоривыимъ хлебъ небесьный одъжди и источи крастели.[961] Тъ и намъ дьньсь мощьнъ есть пищю подати». То слышавъ, келарь отиде. И блаженый моляше Бога о сихъ. И се прежереченый онъ боляринъ, Богу ему възложьшю на умъ, се бо напълнивъ три возы брашьна: хлебъ, и сыръ, и рыбъ, сочиво же и пьшено, еще же и медъ, и то посъла къ блаженому въ манастырь. И еже видевъ, блаженый прослави Бога и глагола келарю: «Видиши ли, брате Феодоре, яко не имать насъ Богъ оставити, аще надеемъся на нь вьсемь сьрьдцьмь. Нъ иди и сътвори обедъ братии великъ въ сий дьнь, се бо посещение Божие есть». И тако блаженый възвеселися съ братиею на обеде веселиемь духовьныимь, бе же самъ еда хлебъ сухъ и зелие варено без масла и воду пия — се же едь его бе вьсегда. И николиже его бе видети дряхла или съньзъшася на обеде седяща съ братиею, нъ вьсегда весело лице имуща и благодатию Божиею бе утешаяся.