Том 1 (XI-XII века)

Боголюбивый же кънязь Изяславъ, иже поистине бе теплъ на веру, яже къ Господу нашему Иисусу Христу и къ пречистей матери его, иже послеже положи душю свою за брата своего[965] по Господню гласу, сь любъвь имея, якоже речеся, не просту къ отьцю нашему Феодосию, и часто приходя къ нему, и духовьныихъ техъ словесъ насыщаяся от него. И тако въ единъ от дьний пришьдъшю тому, и въ цьркви седящема има на божьствьней тои беседе, и годъ бысть вечерьний. Тако же сий христолюбьць обретеся ту сь блаженыимь и съ чьстьною братиею на вечерьниимь славословии. И абие Божиею волею дъждю велику леющюся, блаженый же, видевъ тако належание дъждю, призъвавъ же келаря, глагола ему: «Да приготовиши на вечерю брашьна на ядь кънязю». Тъгда же приступи къ нему ключарь, глаголя: «Господи отьче! Меду не имамъ, еже на потребу пити кънязю и сущиимъ съ нимь». Глагола тому блаженый: «Ни ли мало имаши?» Отвеща онъ: «Ей, отьче, яко ни мало не имамъ, беаше бо, якоже рече, опроворотилъ таковый съсудъ тъщь и ниць положилъ». Глагола тому пакы блаженый: «Иди и съмотри истее, еда осталося или мало чьто от него будеть». Онъ же отвещаваше рекый: «Ими ми веру, отьче, яко и съсудъ тъ, въ немьже бе таковое пиво, опровратихъ и тако ниць положихъ». То же блаженый, иже поистине испълъненъ духовьныя благодети, глагола тому сь: «Иди по глаголу моему и въ имя Господа нашего Иисуса Христа обрящеши медъ въ съсуде томь». Онъ же, веру имъ блаженому, отъиде, и пришьдъ въ храмъ, и по словеси святааго отьца нашего Феодосия обрете бъчьвь ту праве положену и пълъну сущю меду. Въ страсе же бывъ и въскоре шьдъ, съповеда блаженому бывъшее. Глагола тому блаженый: «Мълъчи, чадо, и не рьци никомуже о томь слова, нъ иди и носи, елико ти на требу кънязю и сущиимъ съ нимь; и еще же и братии подай от него, да пиють. Се бо благословление Божие есть». Таче пакы дъждю преставъшю, отъиде христолюбьць въ домъ свой. Бысть же тако благословление въ дому томь, якоже на мъногы дьни довъльномъ имъ темь быти.

Въ единъ же пакы от дьний от единоя вьси приде мьнихъ манастырьскый къ блаженому отьцю нашему Феодосию, глаголя, яко «въ хлевине, идеже скотъ затваряемъ, жилище бесомъ есть, темьже и многу пакость ту творять въ немь, якоже не дадуще тому ясти. Многашьды же и прозвутеръ молитву творить и водою святою покрапляя, то же никако: оставшася зълии ти беси, творяще муку и доселе скоту». Тъгда же отьць нашь Феодосий въоруживъся на ня постъмь и молитвою по Господню гласу, еже рече: «Сь родъ изгониться ничимьже, тъкъмо молитвою и постъмь». Темьже уповая блаженый, яко имать прогънати я от места того, якоже древле от месильниця. И прииде въ село то и вечеръ въниде единъ въ хлевину ту, идеже беси жилище имяхуть, и, затворивъ двьри, ту же пребысть до утрьняя, молитву творя. Якоже от того часа не явитися бесомъ на то место, се же ни въ дворе пакости творити никомуже. Молитвами преподобьнааго отьца нашего Феодосия, яко се оружиемь отгънани быша от вьси тоя. И тако пакы блаженый приде въ манастырь свой, яко храбъръ сильнъ, победивъ зълыя духы, пакостьствующа въ области его.

Пакы же неколи въ единъ от дьний къ сему блаженому и преподобьному отьцу нашему Феодосию приде старей пекущиимъ, глаголя, яко «мукы не имамъ на испечение хлебомъ братии». Глагола тому блаженый: «Иди, съглядай въ сусеце, еда како мало мукы обрящеши въ немь, донъдеже пакы Господь попечеться нами». Онъ же ведяашеся, яко и помелъ бе сусекъ тъ и въ единъ угълъ мало отрубъ, яко се съ трое или съ четверы пригъръще, темьже глаголааше: «Истину ти вещаю, отьче, яко азъ самъ пометохъ сусекъ тъ, и несть въ немь ничьсоже, разве мало отрубъ въ угъле единомь». Глагола тому отьць: «Веру ми ими, чадо, яко мощьнъ есть Богъ, и от техъ малыихъ отрубъ напълънить намъ сусекъ тъ мукы, иже якоже и при Илии сътвори въдовици оной, умъноживъ от единехъ пригъръщь мукы множьство, якоже препитатися ей съ чады своими въ гладьное время, донъдеже гобино бысть въ людьхъ. Се бо ныне тъ же есть, и мощьнъ есть и такоже и намъ от мала мъного сътворити. Нъ иди и съмотри, еда благословление будеть на сусеце томь». То же слышавъ, онъ отьиде, и яко въниде въ храмъ тъ, ти виде сусекъ тъ, иже бе пьрьвее тъщь, и молитвами преподобьнааго отьца нашего Феодосия пълънъ сущь мукы, якоже пресыпатися ей чресъ стену на землю. Тъгда же въ ужасти бысть, видя таковое преславьное чюдо и, въспятивъся, блаженому съповеда. То же святый къ тому: «Иди, чадо, и не яви никомуже сего, нъ сътвори по обычаю братии хлебы. Се бо молитвами преподобьныя братия нашея посъла Богъ милость свою къ намъ, подая намъ вься на потребу, егоже аще хощемъ».