Том 1 (XI-XII века)

Нъ се пакы лепо есть намъ сия съповедавъше на прокое похваление блаженааго съказание поити и яже о немь достойная съ истиною исповедающе, еже по Господи нашемь Исусе Христе того рьвьние. Се бо и сиць обычай имяше блаженый, якоже многашьды въ нощи въстая и отай вьсехъ исхожааше къ жидомъ, и техъ еже о Христе препирая, коря же и досажая темъ, и яко отметьникы и безаконьникы техъ нарицая, жьдаше бо еже о Христове исповедании убиенъ быти.

И се же якоже бе отъходя въ постьныя дьни въ прежереченую пещеру и оттуду пакы многашьды, якоже того не ведущю никомуже, въ нощи въставъ и, Богу того съблюдающю, отходяаше единъ на село манастырьско, и ту уготоване сущи пещере въ съкръвене месте, и никомуже того ведущю, пребывааше въ ней единъ до Вьрьбьныя неделя, и такоже пакы преидяше пакы въ нощи въ прежереченую пещеру, и оттуда въ пятъкъ Вьрьбьныя неделя къ братии излазяаше, якоже темъ мьнети, ту ему пребывъшю въ постьныя дьни. И тако пребывааше, не дадый себе покоя бъдениемь и молитвами вьсеми нощьныими о стаде своемь, моля Бога и того призывая помощьника имъ быти о вьсякомь подвизе ихъ, и во вься нощи обиходя дворъ манастырьскый и молитву творя, и тою огражая и яко градъмь твьръдъмь стрегый, яко да не въшьдъ змий лукавый пленить кого от ученикъ его. И тако бе оградилъ вься области его манастырьскыя.

Се бо неколи ятомъ бывъшемъ мужемъ разбой творящемъ от некыихъ стрегущиихъ дому своего, и бысть съвязаномъ имъ сущемъ и ведомомъ въ градъ къ судии. И се по изволению Божию сълучися имъ миновати мимо едино село манастырьское, и единъ от зълодей техъ съвязаныихъ, покывавъ главою на село то, глаголааше якоже «неколи въ едину нощь приидохомъ къ двору тому, разбой хотяще творити и поимати вься сущая, и видехомъ градъ сущь высокъ зело, яко не мощи намъ приближитися емь», Сице бо бе благый Богь оградилъ невидимо вься та съдьрьжания молитвами правьдьнааго и преподобьнааго сего мужа. Темьже и божьствьный Давидъ о семь предъизвеща, рекый: «Очи Господьни на правьдьныя и уши его въ молитву ихъ».[968] Присно бо Владыка, съзьдавый ны, прикладаеть слуха своя на послушание призывающимъ и́ въистину, и такоже молитву ихъ услышавъ, спасе я. Сьде же по воли ихъ и прошению вься творить, имъ же упъвающиимъ на нь.

Сицево преподобьному и преблаженому отьцю нашему Феодосию пасущю стадо свое съ вьсякыимь благочьстиемь и чистотою и еще же и житие свое съ въздьрьжаниемь и подвигъмь исправляющю, бысть въ то время съмятение некако[969] от вьселукавааго врага въ трьхъ кънязьхъ, братии сущемъ по плъти, якоже дъвема брань сътворити на единого старейшааго си брата, христолюбьца, иже поистине боголюбьця Изяслава. То же тако тъ прогънанъ бысть от града стольнааго, и онема, пришьдъшема въ градъ тъ, посылаета же по блаженааго отьца нашего Феодосия, бедяща того прити къ тема на обедъ и причетатися неправьдьнемь томь съвете. То же, иже бе испълъненъ Духа Святаго, преподобьный же Феодосий разумевь, еже неправьдьно суще изгънание, еже о христолюбьци, глаголеть посъланому, яко «не имамъ ити на тряпезу Вельзавелину[970] и причаститися брашьна того, испълнь суща кръви и убийства». И ина же многа укоризьна глаголавъ, отпусти того, рекый, яко да възвестиши вься си посълавъшимъ тя.

Нъ обаче она, аще и слышаста си, нъ не възмогоста прогневатися на нь, видяста бо правьдьна суща человека Божия, ни пакы же послушаста того, нъ устрьмистася на прогънание брата своего, иже от вьсея тоя области отъгънаста того, и тако възвратистася въспять. И единому седъшю на столе томь брата и отьца своего, другому же възвративъшюся въ область свою.