Том 1 (XI-XII века)

Сицево же чюдо о цьркви той и инъгда пакы виде единъ от боляръ христолюбьця Изяслава. Яздящю тому неколи въ нощи на поли, яко 15 попьрищь от манастыря блаженааго. И се виде цьркъвь у облака сущу. И въ ужасти бывъ, погъна съ отрокы, хотя видети, кая то есть цьркы. И се яко доиде манастыря блаженааго Феодосия, тъгда же, оному зьрящю, съступи цьркы и ста на своемь месте. Оному же тълъкнувъшю въ врата, и вратарю отвьрьзъшю ему врата, въниде и поведа блаженому бывъшее. И оттоле часто приходяше къ нему и насыщаяся от него духовьныихъ техъ словесъ, подаваше же и от имения своего на състроение манастырю.

И се же пакы инъ боляринъ того же христолюбьця идый неколи съ князьмь своимь христолюбьцьмь на ратьныя, хотящемъ имъ брань сътворити, обещася въ уме своемь, глаголя, яко «аще възвращюся съдравъ въ домъ свой, то дамь святей Богородици въ манастырь блаженааго Феодосия 2 гривьне золота, еще же и на икону святыя Богородиця веньць окую». Таче бывъшю сънятию и многомъ от бою оружиемь падъшемъ. Послеже побежени бывъше ратьнии, си же спасени възъвратишася въ домы своя. Боляринъ же забысть еже дасть святей Богородици. И се по дьньхъ неколицехъ, съпящю ему въ полудьне въ храмине своей, и се приде ему глас страшьнъ, именьмь того зовущь его: «Клименте!» Онъ же въспрянувъ и седе на ложи. Ти виде икону святыя Богородиця, иже бе въ манастыри блаженаго, предъ одръмь его стоящю. И глас от нея исхожааше сице: «Почто се, Клименте, еже обеща ми ся дати, и неси ми далъ? Нъ се ныне глаголю ти: потъщися съвьрьшити обещание свое!» Си же рекъши, икона святыя Богородиця невидима бысть от него. Тъгда же боляринъ тъ, въ страсе бывъ, таче възьмъ, имь же бе обещалъся, несъ въ манастырь, блаженому Феодосию въдасть, такоже и веньць святыя Богородиця на иконе окова. И се же пакы по дьньхъ немнозехъ умысли тъ же боляринъ дати Еваньгелие въ манастырь блаженааго. Таче, яко приде къ великууму Феодосию въ манастырь, имый подъ пазухою съкръвено святое Евангелие, и по молитве хотящема има сести, оному не у еще явивъшю Еуангелия, глагола тому блаженый: «Пьрьвее, брате Клименте, изнеси си святое Еуангелие, еже имаши въ пазусе своей и еже обещалъ еси дати святей Богородици, ти тъгда сядемъ». Се слышавъ, онъ ужасеся о проповедании преподобьнааго, не бе бо никомуже о томь възвестилъ. И тако изнесъ святое то Еваньгелие, въдасть блаженому на руце, и тако седъ и духовьныя тоя беседы насытивъся, възвратися въ домъ свой. И оттоле велику любъвь имяаше къ блаженому Феодосию и часто прихожааше къ нему, и велику пользу приимаше от него.

И егда же сии прихожааху къ нему, то же си и тако по божьствьнемь томь учении предъставляаше темъ тряпезу от брашьнъ техъ манастырьскыихъ: хлебъ, сочиво и мало рыбъ. Мъногашьды же и христолюбьцю Изяславу и таковыихъ брашьнъ въкушающю, якоже и веселяся, глаголаше блаженому Феодосию: «Се, якоже веси, отьче, вьсехъ благыихъ мира сего испълънися домъ мой, то же несмь тако сладъка брашьна въкушалъ, якоже ныне сьде. Многашьды бо рабомъ моимъ устроившим различьная и многоценьная брашьна, ти не суть така сладъка. Нъ молю ти ся, отьче, повежь ми, откуду есть сладость си въ брашьне вашемь?» Тъгда же богодъхновеный отьць Феодосий, хотя уверити того на любъвь Божию, глагола ему: «То аще, благый владыко, сия уведети хощеши, послушай насъ, и поведе ти. Егда бо братии манастыря сего хотящемъ варити, или хлебы пещи, или кую ину служьбу творити, тъгда же пьрьвое шьдъ единъ от нихъ възьметь благословление отъ игумена, таче по сихъ поклониться предъ святыимь олътарьмь три краты до земля, ти тако свещю въжьжеть от святаго олътаря и отъ того огнь възгнетить. И егда пакы воду въливая въ котьлъ, глаголеть старейшине: “Благослови, отьче!” И оному рекущю: “Богъ да благословить тя, брате!” И тако вься служьба ихъ съ благословлениемь съвьрьшаеться. Твои же раби, и якоже рече, делають сварящеся и шегающе и кльнуще другъ друга, многашьды же и биеми суть от приставьникъ. И тако же вься служьба ихъ съ грехъмь сътваряеться». То же слышавъ, христолюбьць глагола: «Поистине, отьче, тако есть, якоже глагола».