Том 1 (XI-XII века)

Тако ти тъщание бе къ Богу надежа преподобьнаго Феодосиа и тако упование имяяше къ Господу нашему Исусу Христу, якоже не имети надежа о земьныихъ никоеяже, ни уповати же ни о чемь же въ мире семь, нъ бе вьсею мыслию и вьсею душею къ Богу въскланяяся и на того вьсе упование възложь, никакоже пекыйся о утрьнимь дьне и Господень глас по вься дьни имяаше на памяти сьрьдця своего, еже рече: «Не пьцетеся ни о чемь же и съмотри же пътиць небесьныихъ, како не сеють, ни жьнють, ниже събирають въ житьниця своя, нъ отьць небесьный питаеть я,[966] кольми паче техъ уньше есте вы». Темьже по вься нощи моляшеся къ Богу съ сльзами о стаде своемь глаголя: «Яко ты ныне еси, Владыко, съвъкупилъ въ место се, и аще годе ти есть жити намъ въ немь, буди намъ помощьникъ и податель вьсемъ благыимъ. Се бо въ имя пресвятыя матере твоея възграженъ бысть домъ сий. Мы же пакы въ твое имя събьраны въ нь, и ты съблюди ны и съхрани от вьсякого съвета вьселукавааго врага и съподоби ны получити вечьную жизнь. Присно же вълагай въ сьрьдця наша страхъ твой, яко да темь причастимъ благая она, яже уготова правьдьникомъ». И тако пакы по вься дьни пребывааше, братию уча, и утешая, и запрещая же никакоже раслабети, нъ крепе быти на вься труды чьрьньчьскыя. И тако прилежаниемь стадо свое пасяаше, блюды и́, еда некако зълокъзньный вълъкъ, въшьдъ, распудить божьствьное то стадо.

Темьже о семь, якоже и человеку некоему христолюбиву и боящюся Бога явлениемь открыся еже о блаженемь и преподобьнемь отьци нашемь Феодосии и о пречистей того и непорочьней молитве, еще же и о святемь того манастыри, и от того пакы показуя ино место, якоже темъ ту преселитися.

Есть бо мала гора, надълежащи надъ манастырьмь темь, и человеку тому туда вь нощи по ней едущю, и се видети тому чюдо испълънь ужасти. Нощи бо сущи тьмьне, светъ же пречюдьнъ тъкъмо надъ манастырьмь блаженааго, и се, яко възьревъ, виде пръподобьнааго Феодосия въ свете томь, посреде манастыря предъ цьрквию стояща, руце же на небо въздевъшю и молитву къ Богу прилежьно творяща. Таче тому зьрящю и чюдящюся о томь, и се ино чюдо явльшеся тому: пламень великъ зело от вьрьха цьркъвьнааго ишьдъ и, акы комара сътворивъся, преиде на другый хълъмъ, и ту темь коньцьмь ста, идеже блаженый отьць нашь Феодосий цьркъвь назнамена, начатъ зьдати послеже. Се же якоже и доныне есть на месте томь манастырь славьнъ. Сий же тако пламень тъ являшеся тому, яко дуга стоя единемь коньцьмь на вьрьху цьркъвьнемь, таче и другыимь на нареченемь месте, донъдеже тому заехавъшю за гору не видети того. Се же якоже то самъ видевъ, исповеда единому от братия въ манастыри блаженааго, иже истиньна суть. Темьже есть лепо намъ съ божьствьныимь Ияковъмь рещи, яко «есть Господь на месте семь и есть свято место се и несть ино, нъ се домъ Божий и си врата небесьная».

И се пакы подобьно есть рещи, еже яко пишеться таково о святемь и велицемь Саве.[967] Се бо въ едину нощь такоже тому шьдъшю ис келия своея и молящюся, и се показася тому стълъпъ огньнъ до небесе сущь. Таче потомь, якоже дошьдъ места того, и обрете въ немь пещеру и ту тако въ мало дьний сътвори манастырь славьнъ. Такоже и сьде разумевати есть, Богу назнаменавъшю место то, еже яко видети есть манастырь славьнъ сущь на месте томь, иже и доныне есть молитвами его цвьтущь.

Сицева ти бе блаженаго отьця нашего Феодосия молитва еже къ Богу о стаде своемь и о месте томь, и сицево бъдение и несъпание по вься нощи, и тако сияше яко светило пресветьло въ манастыри томь.

Темьже тако того молитвами благый Богъ ино пакы чюдо показа о святемь томь месте человекомъ близь ту живущемъ, иже якоже и послеже съповедаша вьсей братии бывъшее. Въ едину бо нощь слышаша гласъ бещисльно поющиихъ. То же якоже ти слышаша глас тъ, въсташа от ложь своихъ и, ишьдъше исъ храмъ и на высоце месте ставъше, съмотряху гласа того. Сияше бо и светъ великъ надъ манастырьмь блаженаго, и се видеша мъножьство чьрьноризьць исходящь отъ ветъхыя цьркве и бяхуть грядуще на нареченое место, носяху же преди икону святыя Богородиця. Вьси иже ти въ следъ идуще, пояху, и вьси въ рукахъ свеще горуще имяхуть, предъ ними же идяше преподобьный отьць ихъ и наставьникъ Феодосий, Таче дошьдъше места того, ту же пение и молитву сътворьше, възвращахуся въспять. И, якоже темъ зьрящемъ, вънидоша пакы поюще въ ветъхую цьрькъвь. Се же не единъ, ни дъва видеста, нъ мънози людие, видевъше сия, съповедааху. Си же, якоже разумети есть, аньгеломъ сице явльшимъся быти, имь же от братия ни единому же сихъ чювъшю, Богу сице извольшю и съкрывъшю отъ нихъ тайну сию. И якоже послеже слышавъше, прославиша Бога, творящааго чюдеса велика и прославляющааго место то и освящающа е молитвами преподобьнааго отьца нашего Феодосия.