Том 1 (XI-XII века)

Къ сему же блаженому неколи приведоша разбойникы съвязаны, ихъ же беша яли въ единомь селе манастырьске, хотяща красти. Блаженый же, видевъ я съвязаны и въ такой скърби суща, съжалиси зело и, просльзивъся, повеле раздрешити я и дати же темъ ести и пити. И тако пакы техъ учаше мъного, еже никогоже преобидети и никомуже зъла сътворити. Подасть же темъ от имения довъльное, еже на потребу, и тако техъ съ миръмъ отпусти, славяща Бога, якоже оттоле темъ умилитися и никомуже зъла сътворити, нъ своими делы довъльномъ быти.

Таково бо бе милосьрьдие великааго отьца нашего Феодосия, аще бо видяше нища или убога, въ скърьби суща и въ одежи худе, жаляашеси его ради и вельми тужаше о семь и съ плачьмь того миновааше. И сего ради сътвори дворъ близь манастыря своего и цьркъвь възгради въ немь святааго пьрьвомученика Стефана,[962] ту же повеле пребывати нищимъ и слепыимъ и хромыимъ и трудоватыимъ, и от манастыря подавааше имъ еже на потребу и от вьсего сущаго манастырьскааго десятую часть даяше имъ. И еще же и по вься суботы посылаше въ потребу возъ хлебъ сущиимъ въ узахъ.

Въ единъ же от дьнии приде къ преподобьнуму Феодосию прозвутеръ от града, прося вина на служьбу святыя литурьгия. И ту абие блаженый, призъвавъ строителя цьркъвьнаго, повеле налияти вина, юже ношаше викию, и дати ему. Онъ же глагола, яко «мало имамъ вина, еже тъкъмо довълееть на 3, или на 4 дьни святей литурьгии». Блаженый же отвеща ему: «Излей вьсе человеку сему, и нами Богъ да попечеться». Онъ же отшьдъ и преобидевъ святааго повеления, вълия ему въ викию мало вина, оставивъ на утрия цьркъвьней служьбе. Прозвутеръ же, несъ, еже мало ему въда, показа блаженому Феодосию. И пакы призъвавъ пономонаря, глагола ему: «Рехъ ти, излей вьсе и о утрейшьниимь дьне не пьцися, не бо имать Богъ оставити цьркве сея въ утрий дьнь бе-служьбы, нъ се въ сий дьнь подасть намъ вина до избытъка». Тъгда же, шьдъ, пономонарь излия вьсе вино прозвутерови и тако и́ отъпусти. Таче по отъедении къ вечеру седящемъ имъ, и се по проречению блаженаго привезоша 3 возы пълъны суще къръчагъ съ винъмь, ихъ же посъла жена некая, иже бе предьрьжащи вься въ дому благоверьнааго князя Вьсеволода. Си же видевъ, парамонарь прослави Бога, чюдяся проповеданию блаженаго Феодосия, еже якоже рече: «Въ сий дьнь вина до избытъка Богь подасть намъ», — такоже и бысть.

Бывъшю же неколи дьни святаго и великаго Димитрия[963], въ нь же Христа ради мучению коньць приятъ, преподобьному же Феодосию съ братиею идущу вь манастырь святаго Димитрия, и се принесоша ему хлебьце не от кыихъ зело чисты, ихъ же повеле келарю предъложити на ядь оставъшии ту братии. И то же онъ, преслушавъся того, помысли въ себе, глаголя, яко «въ утрей дьнь, пришьдъши вьсей братии, предъложю сия хлебы на едь имъ; ныне же манастырьскый хлебъ и да предъложю сей братии». Якоже помысли, такоже и сътвори. И въ утрей дьнь седъшемъ имъ на обеде, хлебомъ же темъ издрезаномъ сущемъ, таче блаженый презьревъ и виде хлебы такы суща, и, пригласивъ келаря, въпрашаше его, откуду си суть хлеби. Онъ же отвещева, яко «вьчера принесени суть, нъ сего ради вьчера малу сущю братии, помыслихъ въ сий дьнь вьсей братии предъложити на ядь». Тъгда же блаженый глагола ему: «Лепо бе не пещися о приходящимь дьни, нъ по повелению моему сътворити. И ныне бы Господь нашь и присно печеться нами, большими попеклъся и подалъ намъ еже на потребу». Таче поведе единому от братие събьрати въ кошь укрухы ты и, несъше, посреде рекы въсыпати е, оного же епитимиею утвьрьди,[964] якоже преслушание сътворьша.

Сицимь же образъмь творяаше, еже аще слышаше кое дело творимо, благословлению пьрвое не възяту бывъшю, не бо хотяаше, да святое стадо того таковааго брашьна въкусити, еже не благословлениемь сътворено и от преслушания суще, нъ се яко вражию часть сущю повелеваше овъгда въ пещь горущю въметати, овъгда же въ речьныя струя въврещи.

Се же якоже по съмьрьти блаженаго отьца нашего Феодосия сицева некака от преслушания вещь бысть, еже аще несть лепо сьде съповедати ея, имь же на въспомяновение того приидохомъ и сему подобьно слово къ слову приложимъ.