Alisa in Divalanda ( Lidepla)

Bakak to lakey jawabi sam solemnem bay same wordas, al sol shanji ley ordina idyen:

- Fon Regina. Invita fo Dukina om plei kroket.

Poy li ambi pokloni nisem, e ley harhalkas hampi intertangli.

Alisa ridi por to tanto gro ke ela majbur lopi inu shulin, dabe li bu audi ela. Wen ela snova ahfi-kan, ela vidi ke Fish to Lakey he fa-wek e ke otre-la zai sidi on arda bli dwar al kan skay stupidem.

Alisa timidem lai a dwar e tuki.

- Tu tuki ga bu es utile, – lakey shwo, – por dwa kausa. Un-nem, por ke me es pa same dwar-taraf kom yu. Dwa-nem, por ke li inen zai shumi tanto gro ke nulwan mog audi yu.

Ver, sertem ga nopinchan suon lai fon inen: konstante wuling e chihing e yoshi regulare krushi-suon, kom si pyata o ketla rupti inu pes.

- Dan, plis, shwo ba, - Alisa shwo, - komo me gai geti inu?

- Yur tuking wud mog bi utile, - Lakey shwo for sin atenti ela, - si nu wud hev dwar inter nu. Pa exampla, si yu wud bi inen, yu wud mog tuki, e me wud lasi yu aus, es ver.

Ta zai kan skay oltaim al shwo, e Alisa ek-dumi ke to es ga nolatif.

- Yedoh shayad ta sim bi mog fai otrem, - ela shwo a swa, - sikom suy okos es ya tanto muy blise a kapasima. Bat enikas ta gai jawabi kwesta.

– Komo me gai geti inu? - ela repeti lautem.

- Me sal sidi hir, - Lakey remarki, - til manya...

Yus al se dwar ofni e un gran pyata flai aus, rek an Lakey-ney kapa; it tachi-ki suy nos e krushifi kontra un baum baken ta.

- ...o mogbi til aftemanya... - Lakey zai kontinu pa yus same ton kom si nixa he eventi.

- Komo me gai geti inu? - Alisa kwesti snova, yoshi pyu lautem.

- Ob yu verem gai geti inu? - Lakey shwo. - Es ya prime kwesta.

To sertem es ver, yedoh Alisa bu pri gei shwo tak.

- Es ya dashat-ney, - ela grumbli a swa, - komo gro oli sey kreatura pri disputi. Es ya basta fo fa-pagale!

Lakey semblem desidi ke es hao taim fo repeti suy remarka kun syao varia.

- Me sal sidi hir, - ta shwo, - duran gro-taim, duran mucho hi dey.

- Bat kwo me hi gai zwo? - Alisa shwo.

- Enisa ke yu yao, - Lakey shwo e begin wisli.

- Oo, in toking kun ta sensu ga yok ya, - Alisa shwo denadi-nem, - ta es ya ga idiotalik.

E ela ofni dwar e go inu.

Toy dwar dukti rek inu gran kukishamba in kel ye ga mucho fum. Dukina zai sidi on tri-gamba-ney stula pa mida al luli bebi. Un kuker zai inklini swa sobre agni al virti-mixi koysa in gran kazan. Semblem it es fule de sup.

- Sertem... chih!... in sey sup ye tro mucho pepa... chih!... - Alisa shwo a swa, obwol to bu es fasile por en-chihi gro.

Amini in aira pepa es verem tro mucho. Iven Dukina chihi koyves; e bebi, ta nau chihi nau wuli oltaim, ga sin pausa. Ye sol dwa kreatura kel bu chihi: to es kuker e gran kota kel zai lagi on ochak al hev gro-smaila fon un aur til otre-la.

- Plis, ob yu wud mog expliki a me, - Alisa shwo idyen timidem por ke ela bu es serte ob es basta latif tu shwo pa un-ney, - way yur kota smaili tak?

- Es ya Chesher-Kota, - Dukina shwo. - Por se hi. Swina!

Ela shwo sey laste worda kun tanto turan-ney forsa, ke Alisa hampi ek-salti. Bat ela vidi tuy ke it fa-adresi a bebi, bu a ela; also ela kuraji shwo for:

- Me bu jan-te ke Chesher-Kota sempre smaili. Pa fakta, me ga bu gwo jan ke kota janmog smaili.

- Oli janmog - Dukina shwo, - e maiste smaili hi.

- Me bu koni nul-la kel smaili, - Alisa shwo muy latifem al sta aika santush por pai fai toka.

- Yu bu jan mucho, - Dukina shwo. - Es ya fakta.

Alisa ga bu pri ton de sey remarka e dumi ke wud bi hao tu shanji toka-tema. Duran ke ela trai selekti koy-la, kuker pren kazan do sup fon agni e turan begin shwai-shwai ti ta mog ateni na olo an Dukina e bebi: un-nem kelke gual-muver flai, poy en-ye gro-pluva-si aus kukipot, pyata e otre bartan. Dukina bu atenti it iven wen it trefi ela; e bebi zai wuli yo tanto gro ke oni ga bu mog shwo ob ta sufri por darba.

- Ay, plis, dumi ba om kwo yu zwo! - Alisa krai al salti-salti pa gro-dashat. - Ay, yus an suy verguy nos!

(Un verem gran kukipot flai pas bebi-ney nos ga bli e hampi mah it wek.)

- Si kadawan wud atenti swa-ney hi dela, - Dukina grumbli raukem, - munda wud roti mucho pyu kway kem al nau.

- To sertem bu wud bi pyu hao, - Alisa shwo al joi gro por hev shansa fo diki idyen swa-ney jansa. - Sim dumi ba, kwo wud eventi an dey e nocha! Es ke duran dwashi-char ora arda fai un rota pa suy axa...

- Axa, axa... chih!... acha, acha... - Dukina shwo. - Apropoo om acha, haki los elay kapa!

Alisa ek-kan kuker aika nokalmem fo samaji ob ta sal obedi, bat kuker zai mangi muvi-mixi sup e semblem bu audi. Also ela shwo for:

- Also duran dwashi-char ora... shayad... o mogbi shi-dwa? Me...

- Oo, bye disturbi me! - Dukina shwo. - Me bu toleri sifras, e neva gwo!

Afte se ta snova begin luli bebi al gani luligana-si e al ek-sheiki ta gro pa fin de kada linia:

"Shatami ba yur syao boy

E bati ta por chihi.

Ta vexi yu, buhao boy,

E pa intenta chihi."

REFRENA

(in kel kuker e bebi en-ko-gani):

"Wul! Wul! Wul!"