Том 1 (XI-XII века)

Азъ, грешный и ленивый, погребый талантъ свой в земли, а не приделавъ имъ ничтоже, и чаю по вся дни на себе онех лютых и немилостивыих истязатель, и прещения оного страшнаго, и гнева лютаго, егда начнет глаголати: «О, злый рабе и ленивый, непотребне, добрее бы створилъ, да бы възвратилъ сребро мое добрым пенязником, и поспешным и детельнымъ, иже быша ми възделали съ лихвою»,[998] ныне же нуждю имею глаголати и глаголю, и, глаголя, не престаю, не яко учитель, но яко рабъ, съ слезами моляся и коленех ваших касаяся, и указаа вамъ предлежащая благаа и грядущаа муки, да бысте не погрешили благыа оноя надежда. Немало бо то зло, еже нам тацех даров лишенымъ быти и въ непроходимая и адъскаа места впасти леностию хождения ради и красотъ маловременных, въ нихже ничсоже успеша, последовавше таковым. Азъ же, унылый, имея в собе корень злаго того проращениа от моея лености, ни самъ входя въ царство небесное и вамъ препону творя своею леностию и своими неподобными нравы, судих себе двоичю и трижды отлучитися от вас. И се створих, не добродетелий деания онехъ святых подражати хотя, но се луче судих, да поне вас не упражняю от благого подвизания, аще бо бых с вами былъ, немалу съпону вам створилъ бых собою, отставилъ вы бых от Божиа пути. Мне бо, грешному, еже единъ день отлучитися от васъ въ все ми ся лето вменяеть, паче же достоания церковнаго и почитаниа божественых словесъ и житиа святыих, егоже облиши мя леность моя немалаа, еюже акы веригами связанъ лежу, и ума моего, акы Лазаря другаго пред враты, повръжена,[999] токмо верное око къ Богу простирая и Богородицу съ вышнею молитвою на помощь призывая, да некако бы ся умилосердилъ благый Богъ ваших деля молитвь и любовь, юже ко мне имеете. Падох бо падениемъ злымъ; аще не Господь бы помоглъ мне и Богородица, вмале не вселилася бы въ адъ душа моя. И видех, чего деля падохъ: оставивъ порученую ми службу, и въследовах трапезамъ, и не чюях себе сводима къ пропасти адьстей. Но человеколюбивый Бог, иже не презре Лазаря, струпы посыпана и гнойна, умерша, но въскресилъ и,[1000] тожде и на мою немощь присети, не призре моея лености, но пусти на мя духъ уныниа, имже угнетаемъ есмь и доныне, егоже деля удалихся от васъ, чая, по писаному, Бога спасающаго мя. Въ моем бо отлучении от вас не чюх себе ничсоже добра приискавша, но токмо имый бдениа и пощениа; не могох скончати якоже вы, да темъ и осудих ся. Вашеа ради любве радуюся, еже в толице зле видяще мою худость, не възгнушастеся моих словесъ, еже въ моемъ отхождении к вамъ изглаголаная, но съ всякым тщанием створисте ̀я. И своея бо лености забых въ вашемь тщании, и еже бо велико поспешение имеете о службе церковней, и въ длъготръпение стоании въ всех бо годинах и службах обретающеся, и божественаго Феодора о заповедехъ радующеся[1001]. Потщание имейте, да тогожде блаженьства сподобистеся и жизни вечней причастници будете о Христе Исусе, Господе нашем.

ПОУЧЕНИЕ СЛОВО КЪ КЕЛАРЮ СВЯТАГО ФЕОДОСИЯ, ИГУМЕНА ПЕЧЕРЬСКАГО МОНАСТЫРЯ В КЫЕВЕ

Брате, се от рукы Христовы и от престола славы его приемлеши сию службу. Имей страхъ его предъ очима си: потщися порученое тобе дело непорочно свершити, да и венца от Христа достоинъ будеши. И да мнить ти ся онъ престолъ вышний, егоже виде Исая, к немуже единъ от серафимъ посланъ бысть, имеяй угль, не опаляяй пророка, но просвещаяй.[1002] Тако же и ты, брате, вземляй ключь, акы огнь, а се от престола, на немже жреться Христосъ по вся дни, аще сию службу, сыну имярек, в чинъ монастырьскый съ душевною приязнию исправиши, щадить ти ся праведный венець и будеть ти сий ключь просвещаяй и спасаяй душю твою. Аще ли уклониши сердце твое преобидети что монастырьское или окрадати что и себе притяжати и сбирати паче, а не манастыреви, и будеть ти сий ключь опаляяй душю твою, зде и въ будущий векъ, геона тя прииметь и судъ Ананьинъ и Самфиринъ постигнетъ тя. Та бо, уемша у цены села своего, напрасно умроста,[1003] ты же горцей муце достоинъ будеши, крадый чюжая или раздаваяй безъ чину своимъ. Геезино прокажьство[1004] наидеть на тя, — не телесно, но душевно. Внимай себе, брате, и службе своей, да спасеть тя Господь ото всех сих молитвами святыя Богородица и всех святыхъ твоихъ, и ныне, и присно.

ВЪПРАШАНЬЕ ИЗЯСЛАВА КНЯЗЯ, СЫНА ЯРОСЛАВЛЯ, ВНУКА ВОЛОДИМИРЯ, ИГУМЕНА ФЕДОСЬЯ ПЕЧЕРЬСКОГО МАНАСТЫРЯ

Что възмыслилъ еси, боголюбивый княже, въпрашати мене, некнижьна и худа о таковей вещи, — въпрашалъ бо еси: аще есть подобно въ день въскресный, еже есть неделя, заклати ли волъ, ли овьнъ, или птицю, или что от техъ и аще подобно мяса ихъ ясти въ день въскресения, въ неделю!