Том 1 (XI-XII века)

Многашьды же пакы, егда възвестяхуть приходъ тому блаженаго, то же, тако ишьдъ, того съреташе, радуяся, предъ двьрьми храму, и тако вънидоста оба в храмъ. Се же, якоже веселяся, глаголаше преподобьному: «Се отьче, истину ти глаголю: яко аще быша ми възвестили отьця въставъша от мьртвыихъ, не быхъ ся тако радовалъ, яко о приходе твоемь. И не быхъ ся того тако боялъ или сумьнелъ, яко же преподобьныя твоея душа». Блаженый же тоже: «Аще тако боишися мене, то да сътвори волю мою и възврати брата своего на столъ, иже ему благоверьный отьць твой предасть». Онъ же о семь умълъче, не могый чьто отвещати къ симъ, тольми бо бе и́ врагъ раждьглъ гневъмь на брата своего, яко ни слухъмь хотяше того слышати. Отьць же нашь Феодосий бе по вься дьни и нощи моля Бога о христолюбьци Изиславе, и еще же въ ектении веля того поминати[973], яко стольному тому князю и старейшю вьсехъ, сего же, якоже рече, чресъ законъ седъшю на столе томь, не веляше поминати въ своемь манастыри. О семь же едъва умоленъ бывъ от братие, повеле и того съ нимь поминати, обаче же пьрьвое христолюбьца, ти тъгда сего благаго.

Великый же Никонъ, видевъ таковое съмятение въ князихъ суще, отьиде съ инема дъвема чьрьноризьцема въ прежереченый островъ, идеже бе манастырь съставилъ, и блаженому Феодосию мъного того моливъшю, яко да не разлучитися има, донъдеже еста въ плъти, и не отходити ему от него. Обаче онъ не послушавъ его о томь, нъ, якоже рече, отъиде въ свое место.

Тъгда же отьць нашь Феодосий, напълнивъся Духа Святааго, начатъ благодатию Божиею подвизатися, якоже въселити тому въ другое место, помагающу тому Святому Духу, и цьркъвь же велику камениемь възградити въ имя святыя Богородиця и приснодевыя Мария, пьрьвей бо цьркви древяне сущи и мале на приятие братии.

Въ начатъкъ же таковааго дела събьрася множьство людий, и место на възгражение овемъ ова кажющемъ, инемъ же ино, и вьсехъ не бе подобьно место княжю полю, близь прилежащю. И се по строю Божию бе благый князь Святославъ туда минуя и, видевъ многъ народъ, въпроси, чьто творять ту. И якоже уведевъ, и съвративъ коня, приеха къ нимъ, и, яко от Бога подвиженъ показа темъ место на своемь поли, веля ту възградити ту таковую цьркъвь. Се же якоже и по молитве тому самому начатъкъ копанию положити. Беаше же и самъ блаженый Феодосий по вься дьни съ братиею подвизаяся и тружая о възгражении таковаго дому. Обаче аще и не съвьрьши его живъ сы, нъ се и по съмьрьти того, Стефану приимъшю игуменьство и Богу помагающю тому молитвами преподобьнааго отьца нашего Феодосия, съвьрьшено дело и домъ съграженъ. Ту же братии преселивъшемъся, и онъдеже малу ихъ оставъшю, и съ теми прозвутеру и диакону, якоже по вься дьни и ту святая литурьгия съвьрьшаеться.

Се же житие преподобьнааго и блаженааго отьца нашего Феодосия, еже от уны вьрьсты до сьде от многаго мало въписахъ. Къто бо довъльнъ вся по ряду съписати добрая управления сего блаженааго мужа, къто же възможеть по достоянию его похвалити! Аще бо искушюся того достойно противу исправлению его похвалити, нъ не възмогу — грубъ сы и неразумичьнъ.

Многашьды же сего блаженаго князи и епископи хотеша того искусити, осиляюще словесы, нъ не възмогоша и акы о камыкъ бо приразивъшеся отскакаху, ограженъ бо бе верою и надежею, еже къ Господу нашему Иисусу Христу, и въ себе жилище Святааго Духа сьтвори. И бысть въдовицямъ заступьникъ и сирыимъ помощьникъ и убогыимъ заступьникъ и, съпроста рещи, вься приходящая, уча и утешая, отпущааше, убогыимъ же подавая, еже на потребу и на пищю тем.

Мънози же того от несъмысльныихъ укаряхуть, то же сий съ радостию та приимааше, се же якоже и от ученикъ своихъ многашьды укоризны и досажения тому приимати, нъ обаче онъ, Бога моля за вься, пребываше. И еще же и о худости ризьней мнози от невеглас, усмихающеся тому, ругахуться. Онъ же и о томь не поскърьбе, нъ бе радуяся о поругании своемь и о укоризне и вельми веселяся, Бога о томь прославляше. Якоже бо аще къто не зная того, ти видяше и́ въ такой одежи суща, то не мьняаше того самого суща блаженааго игумена, нъ яко единого от варящиихъ. Се бо и въ единъ дьнь идущю тому къ делателемъ, идеже беша цьркъвь зижющеи, сърете и того убога въдовиця, яже бе от судии обидима, и глагола тому самому блаженому: «Чьрьноризьче, повежь ми, аще дома есть игуменъ вашь?» Глагола той блаженый: «Чьто требуеши от него, яко тъ человекъ есть грешьнъ?» Глагола тому жена: «Аще грешьнъ есть, не вемь, тъкъмо се вемь, яко многы избави от печали и напасти, и сего ради и азъ придохъ, яко да и мне поможеть, обидиме сущи бес правьды от судии». Таче блаженый уведевъ, яже о ней, съжалиси, глагола той: «Жено! Ныне иди въ домъ свой, и се, егда придеть игуменъ нашь, то же азъ възвещю ему, еже о тебе, и тъ избавить тя от печали тоя». То же слышавъши жена отъиде въ домъ свой, и блаженый иде къ судии и еже о ней глаголавъ тому, избави ту от насилия того, якоже тому посълавъшю възвратити той, имь же бе обидя ю.