Том 1 (XI-XII века)

И въ единъ день, полудьнию сущу, прииде по обычаю христолюбьць Изяславъ съ малъмь отрокъ: егда хотяше поехати къ блаженууму, тъгда распустяше вся боляры въ домы своя, нъ тъкмо съ шестию или съ пятию отрокъ прихожааше къ нему. Се же, яко рекъхъ, приехавъ и съседе съ коня, ни бо николиже еха на дворъ манастырьскый, и приступивъ къ вратомъ повеле отъврьсти, вънити хотя. Онъ же отъвеща ему, яко повеление есть великааго отьца не отъврьзати вратъ никомуже, дондеже годъ вечерьний будеть. Таче пакы христолюбьць възвещая ему, да увесть, къто есть. И глаголаше: «Се бо азъ есмь, и мне отъврьзи врата единому». Онъ же, не ведый, яко князь есть, отъвещавааше ему сице: «Рехъ ти, яко повелено ми есть отъ игумена, яко аще и князь приидеть, не отъврьзи вратъ, то уже аще хощеши, потрьпи мало, дондеже годъ будеть вечерьний». Онъ же отъвеща, яко «Азъ есмь князь, то или мне не отъврьзеши». Тъгда изникъ видетъ, и познавъ князя его суща, и въ страсе бывъ, не отъврьзе вратъ, нъ блаженууму съповедатъ тече, оному же стоящю предъ враты и тьрпящю, о семь подражающю святаго и вьрховьняаго апостола Петра: изведену бо бывъшю тому ангелъмь ис тьмьнице и пришьдъшю ему къ дому, идеже беша ученици его и тълкънувъшю ему въ врата, и се рабыни изникнувъши, виде Петра стояща, и от радости же не отврьзе воротъ, нъ, текъши, поведа ученикомъ приходъ его. Тако же и сь от страха не отврьзе вратъ, нъ скоро текъ, поведа блаженууму христолюбьца. Таче блаженый ишедъ и видевъ князя и поклонися ему, и по сихъ начатъ глаголати ему христолюбьць: «О како, отьче, запрещение твое, еже глаголеть чьрноризьць сий, яко, аще и князь приидеть, не пустити его». Блаженый же отвеща: «Сего ради глаголють, владыко благый, повеление то, якоже да въ годъ полудьньный не исходять братия из манастыря, нъ починуть въ то время, нощьнааго ради славословия. Твое же Богъмь подвижьное тъщание къ святей владычици нашей Богородици благо и души твоей на успехъ. И мы же вельми радуемъся о прихожении твоемь», таче по сихъ шедъшема има въ цьркъвь и сътворивъ молитву седоста. Ти тако христолюбивый князь насыщашеся медоточьныихъ техъ словесъ и иже исхожааху от устъ преподобьнааго отьца нашего Феодосия и велику пользу приимъ отъ него, иде въ домъ свой, славя Бога. И от того дьне большиими начатъ любити и́, тако имяше его, яко единого отъ прьвыихъ святыихъ отьць и вельми послушааше его и творяаше вся повеленая ему отъ великааго отьца нашего Феодосия.

Божествьный же Варламий, сын Иоана болярина, игуменъ же манастыря святаго мученика Дьмитрия, иже възгради христолюбивый князь Изяславъ, иде въ святый градъ Иерусалимъ. Таче походивъ святая та места, възвратися въ свой манастырь и пакы по времени некоторемь иде въ Костянтинь градъ, и ту такоже походи вся манастыря и искупивъ, еже на пользу манастырю своему, и тако поиде на конихъ въ страну свою. Идый же путьмь и уже въ странахъ своихъ си, въпаде въ недугъ лютъ. Таче, яко доиде града Володимеря, въниде въ манастырь, ту сущий близъ города, иже наричюти и Святая гора, ту же усъпе съ миръмь и житию коньць приятъ. И заповедавъ сущиимъ с нимь, да доправять тело его въ манастырь святааго и блаженааго отьца нашего Феодосия и ту положать е, и вся сущая, яже бе искупилъ въ Костянтини граде — иконы и ино, еже на потребу, повелевъ туда, иде же самъ, ту же и то повеле въдати блаженууму, якоже заповеда имъ. Ти тако донесъше тело его, положиша е въ манастыри блаженаго и преподобьнааго отьца нашего Феодосия на десней стране цьркве, идеже и доныне есть гробъ его.

Тъгда же христолюбивый князь от манастыря великааго отьца нашего Феодосия избьравъ единого отъ братия, иже въ чьрньчьскемь житии просиявъша, Исаию наричемааго, того же, изведъ, игумена постави въ манастыри своемь у святааго мученика Димитрия, иже и послеже добрыхъ ради нравъ его, поставленъ бысть епискупъмь Ростову городу.

Тъгда же великий Никонъ, умьръшю Ростиславу князю острова того,[953] умоленъ бысть отъ людий техъ преити къ Святославу князю и молити и́, да пустить къ нимъ сына своего, да сядеть на столе томь. Таче яко и пришьдъ, прииде въ манастырь блаженааго отьца нашего Феодосия, и яко видеста другъ друга, падъша оба въкупе, поклонистася, и тако пакы охопистася, и надълзе плакастася, якоже много время не видевъшася.