Alisa in Divalanda ( Lidepla)

Pa fin Maus, kel semblem es gaurawe persona in sey kompania, krai:

- En-sidi ba, yu oli, e audi me! Me sal mah yu suhe kway!

Li oli tuy en-sidi pa gran ronda al Maus in mida. Alisa zai kan ta fixem, bikos ela es serte ke ela ve fai lengitura si ela bu fa-suhe ga sun.

- Hm! Kaf! - Maus shwo gaurawem. - Oli tayar ku? Walaa un verem suhe rakonta to lektia. Fai ba silensa yu oli, plis! Efektivitaa de agrare produkting sin eni duba tendi dependi fon mucho faktor, inter kel gai-ke sistema de arosing zuy probablem okupi prime plasa, al kondision ke klima-ney halat bu exklusi posiblitaa de suhitaa, lo kel presuposi regulare arosing fo preventi suhifa de sereal.

- Uf! - Lori shwo al ek-tremi por lenga.

- Me pregi pardona! - Maus shwo al fruni, bat muy latifem. - Ob yu he fai shwoing?

- Bu me! - Lori shwo pa hasta.

- He sembli a me ke yu hi. - Maus shwo. - Me fai for. Relatem gai-ke sistema de arosing, vigyaner do agrare fah findi se konsilival, tu...

- Findi kwo? - Utka kwesti.

- Findi se, - Maus jawabi aika vexem. - Sertem yu jan kwo 'se' maini.

- Me jan ya kwo 'se' maini, wen me findi koysa, - Utka shwo. - Pinchanem es bakak o wurma. Bat kwo vigyaner he findi?

Maus bu merki kwesta e hasti-shwo for:

- ...findi se konsilival, tu fai muchofaktor-ney analis de lokale agrare halat bifoo fai desida om gai-ke tip de arosing-sistema dabe it wud maximalem korespondi a... Komo yu sta nau, kare? - ta turni a Alisa al shwo.

- Haishi ga mokre, - Alisa shwo aika tristem. - Sembli ke se bu mah me pyu suhe.

- In sey kasu - Dodo deklari al en-stan, - me fai proposa om ajorna de asembla por nesesitaa de sindera-nem fai pyu energike stepa kontra...

- Shwo normalem! - Yunorla shwo. - Me bu jan signifa de haf de sey wordas, e yoshi me bu kredi ke yu hi jan.

E Yunorla nichisi kapa fo ahfi smaila. Kelke otre faula fai hi-hi audibilem.

- Me yao-te shwo, - Dodo jawabi ofensi-nem, - ke zuy hao kosa fo mah nu suhe wud bi basar-kompeta.

- Kwo es basar-kompeta? - Alisa shwo. Bu es ke ela verem yao jan, bat Dodo he fai pausa kom si koywan gai shwo, e nulwan sembli yao shwo nixa.

- Wel, - Dodo shwo, - zuy hao explika es tu fai it.

(Shayad yu ve yao probi fai sama pa koy hima-dey, also me sal rakonti kwo Dodo zwo.)

Un-nem ta marki lopi-trek bay ronde-si linia on arda (“Exakte forma bu mihimi,” - ta shwo) e poy ol kompania es plasen along linia sin ordina. Bu ye “un, dwa, tri, los!”, bat kadawan en-lopi wen ta yao e stopi wen ta yao, also bu es fasile tu samaji wen kompeta es finen. Yedoh, afte sirke haf-ora, wen li oli es ga suhe snova, Dodo turan krai: “Lopa es finen!” - e oli en-mengi sirkum ta al spiri gro e al kwesti: "Bat hu jiti?”

Den sey kwesta Dodo bu mog jawabi sin dumi gro, also ta stan longem al finga kontra frenta (in tal posa oni pinchanem vidi Shekspir pa piktura), duran ke otras weiti silensi-yen. Pa fin Dodo shwo:

- Oni shwo ke basar-kompeta es sarwem utile. Also kadawan hi jiti, e oli hi mus pai pris.

- Bat hu mus rasdai pris? - mucho vos kwesti tuy.

- Wel, naturalem ela, - Dodo shwo al diki a Alisa bay finga, ewalaa ol kompania tuy fai menga sirkum ela al sobrekrai mutu: “Pris! Pris!”

Alisa bu hev nul idea kwo zwo. Ela perplexem pon handa inu posh, austiri un boxa kun bonbones (pa fortuna solti-ney akwa bu pai geti inu it), e rasdai li oli kom pris, yus po un bonbon a kadawan.

- Bat ela selfa toshi ya mus pai pris, - Maus shwo.

- Sertem, - Dodo shwo, gro-gaurawem. - Kwo yoshi ye in yur posh? - ta kwesti al turni versu Alisa.

- Sol un fingadan, - Alisa shwo tristem.

- Handi ba it a me, - Dodo shwo.

Ewalaa oli snova fai menga sirkum ela, e Dodo solemnem doni a ela toy fingadan al shwo:

- Nu pregi ke yu aksepti sey elegante fingadan.

Wen sey kurte bashan es finen, oli aklami.

To olo sembli ga drole a Alisa, bat li oli aspekti tanto gambirem ke ela bu kuraji ridi. Also, al bu jan kwo shwo, ela simplem pokloni e pren fingadan, trai-yen aspekti tanto solemne kom posible.

Sekwi-she dela es tu chi bonbon. Se kausi kelke shum e garbar: gran faulas shakwi ke li bu he pai senti gusta, e syao-las hev mushkila al gloti, also oni treba klapi li pa bey. Yedoh pa fin bonbon es chi-ney, e oli snova en-sidi pa ronda e pregi ke Maus rakonti koysa pyu.

- Yu he wadi ya rakonti yur historia, - Alisa shwo, - e expliki way yu heni li, K e D, - ela hamsi-adi al haf-fobi ke Maus ve fa-ofensi snova.

- Me-ney es longe e triste, kaulu ba! - Maus shwo al turni versu Alisa e al sospiri.

Alisa ouran misaudi “kaulu ba” kom “kauda”.

- Es longe hi, - Alisa shwo al kan nich an Maus-ney kauda, - bat way yu shwo ke es triste?

E duran ke Maus zai shwo, ela dumi for om kauda, also fo Alisa Maus-ney historia simili lo sekwi-she:

Kota shwo a un maus,

kel fon kela fa-aus:

"Aa, me jan, ya, me jan,

Ke yu chori ya fan.

Yu es chorer in kela,

Nu mus fai judidela

Nu dwa go ba a judiguan!

Maus shwo: "Oo sinior,

Lasi plis me go for

Ni judista hir yok

Ni ya juri nullok,

Oni fai judidela bu mog!”

“Me's judista e juri.

Dela sey bu ve duri.

Por gunah d'oli sort’

Yu's kondamnen a mort

Bay may gao judista-ney word'”!