Том 1 (XI-XII века)

Въ лето 6505. Володимеру шедшю к Новугороду по верхъние вое на печенегы, бе бо рать велика бес пересту. В то же время уведаша печенезе, яко князя нету, придоша и сташа около Белагорода. И не дадяхуть вылести из града. Бе бо голодъ великъ вь граде, и не лзе Володимиру помочи, и не бе лзе поити ему, и еще бо ся бяхуть не собрали к нему вои, печенегь же бе множьство много. И удолжишася, остояче вь граде люди, и бе глад великъ. И створиша вече вь граде и реша: «Се хочемь помрети от глада, а от князя помочи нетъ. Да луче ли ны умрети? Вдадимся печенегомъ, да кого ли оживят, кого ли умертвять, уже помираемь от глада». И тако светъ створиша. И бе же одинъ старець не былъ в вечи томь, вьпрашаше: «Что ради створиша вече людье?» И поведаша ему, яко утро хотять ся людье передати печенегомъ. Се же слышавь, посла по старейшины градьскыя и рече имъ: «Слышахъ, яко хочете передатися печенегомъ». Они же реша: «Не стерпять людье голода». И рече имъ: «Послушайте мене, не предайтеся за три дни, и азъ что вы велю и створите». И они же ради и обещашася послушати. И рече имъ: «Сберете по горьсти овса, или пшенице, ли отруб». Они же, шедше, ради снискаху. И повеле женам створити цежь, в немже варять кисель, и повеле копати кладязь, и вьставити тамо кадь, и налья цежа кадь. И повеле копати другий кладязь и вьставити тамо другую кадь. Повеле имь искати меду. Они же, шедше, взяша лукно меду, бе бо погребено вь княжи медуши. И повеле росытити воду велми и вьльяти вь кадь и в друземь кладязе тако. Наутрея же посла по печенегы. Горожани же рекоша, шедше, печенегомъ: «Поимете к собе тали наша, а васъ до 10 мужь идете вь градъ и видите, что ся дееть вь граде нашемь». Печенези же раде бывше, мняще, яко хотять ся передати, а сами избраша лучшии мужи вь граде[502] и послаша я вь град, да розъглядають, что ся дееть вь граде у нихъ. И придоша вь градъ, и рекоша людие: «Почто губите себе? Коли можете перестояти нас? Аще стоите 10 лет, что можете створити намъ? Имеемь бо кормьлю от земля. Аще ли не веруете, да видите своима очима». И приведоша я кь кладязю, идеже цежь, и почерпоша ведромъ и льяху в латкы. И варяху пред ними, и яко свариша пред ними кисель, и поемь я, и приведоша кь другому кладязю, и почерпоша сыты, и почаша ясти первое сами, потом же и печенезе. И удивишася, рекоша: «Не имуть сему веры наши князи, аще не ядять сами». И людье нальяша корчагу цежа и сыты от кладязя и вдаша печенегомъ. Они же, пришедше, поведаша вся бывшая. И вариша кисель, и яша князи печенежьстии и подивишася. И поемше тали своя, а онехъ пустивше, и вьсташа от града, и вь своя идоша.

Въ лето 6506. Въ лето 6507.

Въ лето 6508. Преставися Малъфридь.[503] В се же лето преставися и Рогънедь, мати Ярославля.

Въ лето 6509. Преставися Изяславъ, отець Брячьславль, сынъ Володимерь.

Въ лето 6510.

Въ лето 6511. Преставися Всеславъ, сынъ Изяславль, внукъ Вълодимерь.

Въ лето 6512. Въ лето 6513. Въ лето 6514.

Въ лето 6515. Принесени святии вь святую Богородицю.

Въ лето 6516. Въ лето 6517. Въ лето 6518.

Въ лето 6519. Преставися цесарици Володимеряа Анна.

Въ лето 6520. Въ лето 6521.

Въ лето 6522. Ярославу сущу в Новегороде и урокомъ дающю 2000 гривенъ от года до года Кыеву, а тысящю Новегороде гридемъ раздаваху. И тако дааху вси посаднице новьгородьстии, а Ярославъ поча сего не даяти Кыеву, отцю своему. И рче Володимиръ: «Теребите путь и мосты мостите» — хотяше бо ити на Ярослава, на сына своего, но разболеся.

Въ лето 6523. Хотящю ити Володимеру на Ярослава, Ярослав же, посла за море и приведе варягы, бояся отца своего. Но Богъ не дасть дьяволу радости. Володимеру же разболевшюся, в се же время бяше у него Борисъ, а печенегомъ идущимъ на Русь, и посла противу имъ Бориса, а самъ боляше велми, в нейже болести и скончася месяца иуля въ 15 день. Умре же Володимиръ, князь великый, на Берестовъмь, и потаиша ̀и, бе бо Святополкъ в Кыеве.[504] И нощью же межи клетми проимавъше помостъ, в ковьре опрятавши и ужи свесиша и на землю, и възложивъша ̀и на сани, и везоша,[505] и поставиша ̀и вь святей Богородици церкви, юже бе самъ создалъ. Се же увидевше людье и снидошася бе-щисла, и плакашася по немь, бояре аки заступника земли ихъ, убозии акы заступника и кормителя. И вложиша ̀и вь гробе мраморяни, спрятавше тело его с плачемь великим, блаженаго князя.