Том 1 (XI-XII века)

О семъ, аще кто убиеть крестьяна русинъ, или христьянъ русина, да умреть, идеже аще створить убийство. Аще ли убежить створивый убийство, еще есть имовить, да часть его, сиречь иже его будеть по закону, да возметь ближний убьенаго, а и жена убившаго да имееть, толцемь же прибудеть по закону. Аще ли есть неимовит створивый убой и убежавъ, да держится тяжи, доньдеже обрящется, яко да умреть.

Аще ли ударить мечемь или бьеть кацемь любо сесудомъ, за то ударение или убьение да вдасть литръ 5 сребра по покону рускому; аще ли будеть неимовить тако створивый, да вдасть елико можеть, и да соиметь съ себе и ты самыя порты своя, в нихъже ходить, да о проче да роте ходить своею верою, яко никакоже иному помощи ему, да пребывает тяжа оттоле не взискаема.

О семь, аще украдет русинъ что любо у крестьянина, или пакы христьянинъ у русина, и ятъ будеть в томъ часе тать, егда татьбу створит, от погубившаго что любо, аще приготовится татьбу творяй: и убиенъ будеть, да не възыщется смерть его ни от хрестьянъ, ни от руси, но паче убо да възметь свое, иже будеть погубилъ. И аще въдасть руце украдый, да ятъ будет темь же, у негоже будеть украдено, и связанъ будеть, и отдасть то, еже сме створити, и створить трижды.

О семь, аще ли кто или русинъ хрестьяну или хрестьянъ русину мучения образомъ искусъ творити и насилье яве, или възмет что любо дружне, да въспятить троичь.

Аще вывержена лодья будет ветромъ великом на землю чюжю, и обрящються тамо иже от нас руси, да аще кто идеть снабьдети лодью с рухломъ своимъ и отсылати пакы на землю крестьяньску, да проводимъ ю сквозе всяко страшно место, дондеже придеть в бестрашно место. Аще ли таковая лодья или от буря, или боронения земнаго боронима,[300] не можеть възвратитися въ своя си места, спотружаемъся гребцемъ бо тоя лодья мы, русь, и допровадимъ с куплею ихъ поздорову. Ти аще ключится близъ земли Грецькы, аще ли ключится такоже проказа лодьи рустей, да проводимъ ю в Рускую земьлю, и да продають рухло тоя лодья, и аще что можеть продати от лодья, воволочимъ имъ мы, русь. Да егда ходимъ въ <...> Грекы или с куплею, или в солбу къ цесареви вашему, да пустимъ я съ честью проданое рухло лодья ихъ. Аще ли ключится кому от тоя лодья в ней убьену быти или бьену быти от нас, руси, или взяти что любо, да повиньни будуть то створшии преждереченную епитемьею от техъ.

Аще полоняникъ обою страну держим есть или от руси, или от грекъ, проданъ въ ину страну, оже обрящеться или русинъ или гречинъ, да искупять и възвратять искупленое лице въ свою страну, и възмуть цену его купящии, или мниться въ куплю над нь челядиная цена. Такоже аще от рати ятъ будеть, да от техъ грекъ, такоже да възвратится въ свою страну, и отдана будеть цена его, якоже речено есть, якоже есть купля.

Егда же требуеть на войну ити, егда же потребу творите, и си хотять почестити цесаря вашего, да аще въ кое время елико ихъ придет, и хотять оставити у цесаря вашего своею волею, да будуть.

О руси, о полоненьи. Многажды от коея убо страны пришедшимъ в Русь и продаемомъ въ крестьяны, и еще же и от хрестиянъ полоненых мьногажды от коея любо страны приходящимъ в Русь, се продаеми бывают по 20 золота, и да придуть в Грекы.

О том, аще украденъ будеть челядинъ рускый, или ускочить, или по нужи проданъ будет, и жаловати начнуть русь, да покажеться таковое о челядине, да имуть и́ въ Русь. Но и гостье, погубиша челядинъ и жалуют, да ищють и обретаемое, да имуть е. Аще ли кто искушения сего не дасть створити местникъ, да погубит правду свою.

О работающих въ Грецехъ руси у хрестьяньского цесаря. Аще кто умреть, не урядивъ своего именья, ци и своихъ не имать, да възратить именье к малымъ ближикамъ в Русь. Аще ли створить обряжение таковый, възмет уряженое его, кому будеть писалъ наследити именье его, да наследит е.[301]

О взимающихъ куплю руси.

О различныхъ ходящихъ въ Грекы и удолжающихъ. Аще злодей не възвратится в Русь, да жалують русь хрестьяньскому царству, и ятъ будеть таковый, и възвращенъ будет, не хотяи, в Русь, Си же вся да творять русь греком, идеже аще ключится таково.

На утвержение же и неподвижение быти межи вами, хрестьяны, и Русью, бывший миръ състворихом Ивановомъ написанием[302] на двою харотью, цесаря вашего и своею рукою, предлежащим честнымъ крестомъ и святою единосущною Троицею единоистиньнаго Бога вашего, извести и дасть нашим послом. Мы же кляхомся къ цесарю вашему, иже от Бога суще, яко Божие здание, по закону и по покону языка нашего, не переступати ни намъ, ни иному от страны нашея от уставленыхъ главъ мира и любве. И таково написание дахомъ царства вашего на утвержение обоему пребывати таковому свещанию, на утвержение и извещение межи нами бывающаго мира. Месяца сентября въ 2, в неделю 15,[303] в лето создания миру 6420».