Том 1 (XI-XII века)

Тъгда же великий Никонъ и другый чьрньць святаго Мины манастыря, болярина тако наречемъ, съвещавъшася, тако отъидоста, хотяща особе сести. И пришьдъша надъ море, ту же и разлучистася отъ себе, якоже се апостола Павьлъ и Варнава на проповедание Христово, якоже пишеться въ Деянихъ апостолъ.[942] Боляринъ же, идый къ Костянтиню граду, обрете островъ среде моря и ту въселися въ ньмь. Поживе лета многа, трьпя зиму и гладъ, и тако успе съ миръмь. Се же и доныне островъ тъ зовомъ есть Боляровъ. Великый же Никонъ отъиде въ островъ Тьмутороканьскый,[943] и ту обретъ место чисто близь града, седе на немь. И Божиею благодатию въздрасте место то, и цьркъвь святыя Богородица възгради на немь, и бысть манастырь славьнъ, иже и доныне есть, прикладъ имый въ сий Печерьский манастырь.

По сихъ же пакы Ефремъ каженикъ отиде въ Костянтинь градъ и ту живяше въ единомь манастыри. Послеже же изведенъ бысть и въ страну сию и поставленъ бысть митрополитъмь въ городе Переяславли. Се же уже многыими наказании предъложение слову створихомъ, обаче отъселе на предълежащее слово възвратимъся, къде се все мину и по отходе отьць техъ.

Тъгда же блаженый отьць нашь Феодосий поставленъ бысть презвутеръмь повелениемь преподобьнааго Антония и бе по вся дьни божьствьную служьбу съвьршая съ всякыимь съмерениемь, бяше бо кротъкъ нравъмь, и тихъ съмыслъмь, и простъ умъмь, и духовьныя всея мудрости испълненъ. Любъвь же непорочьну имея къ всей братии, бе бо уже съвъкупилося братия яко до пяти-на-десяте. Преподобьный же Антоний, якоже бе обыклъ единъ жити и не трьпя всякого мятежа и мълвы, затворися въ единой келии пещеры, поставивъ въ себе место братии блаженаго Варлаама, сына болярина Иоана. И отътуда пакы преселися на инъ хълмъ Антоний и, ископавъ пещеру, живяше, не излазя из нея, идеже и доныне чьстьное тело его лежить. Тъгда же божествьный Варламъ постави надъ пещерою малу цьрквицю въ имя святыя Богородица, веля, да ту братия събираються на божьствьное словословие. То уже всемъ явлено бысть место то, бе бо мноземи суще преже не ведомо.

А еже испьрва житие ихъ въ пещере, и елико скърби и печали прияша, тесноты ради места того, Богу единому съведущю, а устомъ человечьскомъ не мощьно исповедати. Къ симъ же и ядь ихъ бе ръжанъ хлебъ тъкмо, ти вода. Въ суботу же ти въ неделю сочива въкушахуть; многашьды же и въ та дьни не обретъшюся сочиву, зелие съваривъше едино и то ядяху. Еще же и рукама своима делахуть дело: ово ли копытьца плетуще и клобукы, и ина ручьная дела строяще и тако, носяще въ градъ, продаяху и темь жито купяху, и се разделяхуть, да къждо въ нощи свою часть измеляшеть на състроение хлебомъ. Таче по томь начатъкъ пению заутрьнюуму творяаху и тако пакы делааху ручьное свое дело. Другоици же въ ограде копахуть зелиинааго ради растения, дондеже будяше годъ божьствьнууму славословию, и тако вьси въкупе съшедъшеся въ цьркъвь, пения часомъ творяахуть, таче святую служьбу съврьшивъше, и тако въкусивъше мало хлеба и пакы деле ся своемь къждо имяшеть. И тако по вся дьни трудящеся, пребывахуть въ любъви Божии.

Отьць же нашь Феодосий съмеренъмь съмыслъмь и послушаниемь вься преспевааше, трудъмь и подвизаниемь и делъмь телесьныимь, бяше бо и телъмь благъ и крепъкъ и съ поспешьствъмь всемъ служаше, и воду нося и дръва из леса на своею плещю, бъдя же по вся нощи въ славословлении Божии. И братии же на опочители суще, блаженый же възьмъ разделеное жито и когождо часть измълъ и поставляше на своемь месте. Другоици же, оваду сущу многу и комаромъ, въ нощи излезъ надъ пещеру и, обнаживъ тело свое до пояса, сядяше, прядый вълну на съплетение копытьцемъ и псалтырь же Давидову поя. Отъ множьства же овада и комара все тело его покръвено будяше, и ядяху плъть его о немь, пиюще кръвь его. Отьць же нашь пребываше неподвижимъ, ни въстая от места того, дондеже годъ будяше утрьний, и тако преже всехъ обреташеся въ цьркви. И ставъ на своемь месте непоступьнъ сы, ни мятыйся умъмь, божьствьное славословие съврьшаше, ти тако пакы и-црькве послеже всехъ излажааше. И сего ради вьси любляхути и́ зело и яко отьца имяхути и́, зело дивящеся съмерению его и покорению.

Таче по сихъ божествьный Варлаамъ, игуменъ сы братии въ пещере, изведенъ бысть княжемь повелениемь въ манастырь святаго мученика Димитрия и ту игуменъмь поставленъ.[944] Тъгда же братия ту сущая въ пещере събравъшеся, изволениемь всехъ, възвестивъше преподобьноуму Антонию, блаженааго отьца нашего Феодосия игумьнъмь себе нарекоша, яко и чьрньчьскую жизнь управивъша и Божия известо заповеди излиха ведуща.