Вирши

Творцу всех Богу славу возсылаю,
яко днесь здрава тебе созерцаю.
Благодетелю мой премилостивый,
живи лет много, живи век щасливый.
Новое лето да ново ти будет
щастием новым. Бог да не забудет
тя возвыжшати и благословити
и царску милость к тебе утвердити.
Ты же утверди милость твою на мя,
раба твоего, во любви ти знамя.

В ДЕНЬ СВЯТАГО И ПРАВЕДНАГО ИОВА [383]

День превеселый ныне совершаем,
Иова свята песньми прославляем.
Многострадалным иже наречеся,
яко во страсти весь приоблечеся.
Страда нищету, пострада и чада
в болезни ему не бяше отрада.
От всюду беды его обыдоша,
обаче уста в ропот не внидоша.
Хвалу он выну Богу возсылаше,
благодарственно вся скорби терпяше.
За то изволил Бог благословити:
вся усугубив лета умножити.
То и во аггела Богом ти есть данны,
благодетелю мне из всех избранны.
Он тя от скорбей имать свобождати
и от болезней плоти защищати.
Он ти сотворит зде щасливо жити,
в божий и в царской милости пребыти.
К тому умолит от благаго Бога,
да ти дарует в мире лета многа.
А по временной жизни и на небе
на радость вечну превлечет тя к себе.
Его же верно аз ти усердствую,
а твои нозе любезно целую.
Моля, да мене в любви сохраниши,
на рабе твоем милость да явиши.
Аз же готов ти выну работати,
стопы твоих ног любезно лобзати.

К ГОСУДАРЮ ЦАРЮ: КНЯЗЮ ФЕОДОРУ ЮРЬЕВИЧУ РОМОДАНОВСКОМУ, С ХЛЕБОМ КО ГОСУДАРЮ ЦАРЮ ПРИХОДЯЩУ В ДЕНЬ АГГЕЛА ЕГО [384]

Пречестный праздник церковь совершает:
днесь Феодора песнми величает,
иже Стратилат[385], храбрый в мире бяше
и Богу живу верно работаше.
Попра идолы, нищым даде злато,
на древе крестном сам распят за то.
Гвоздми пронзеся, стрелми уязвися,
но от аггела паки устрашися.
Страда до смерти за Бога живаго,
паче онаго не зная инаго.
Тем же днесь в небе со Христом царствует,
о молящихся ему молебствует.
Аз убо его сподоблен прияти,
имя святое дерзаю прошати.
Да молит Бога Сын в небесной славе
о твоей царстей пресветлой державе.
Во еже бы ти многолетствовати,
в здравии, в щастии выну пребывати.
Купно царица чада и царевны
да будут свыше Богом ублаженны.
Феодор имя дар божий являет,
дар божий с небес вас да присещает[386].
Храбрый бе Феодор, храбрость убо тебе
и твоим воим да умолит в небе,
во еже бы ти враги побеждати,
мир утвердити, царство разширяти.
Сих благ усердно аз тебе желаю,
пресветлый царю, аз хлеб приношаю.
Сей со поклоном во усердства знамя
прими, а призри милостивно на мя,
раба твоего, иже ти служити
рад есмь, дондеже даст ми Господь жити.

ВРУЧЕНИЕ КНИГИ «ВЕНЦА ВЕРЫ» БЛАГОРОДНОЙ И БЛАГОВЕРНОЙ ГОСУДАРЫНЕ ЦАРЕВНЕ ВЕЛИКОЙ КНЯЖНЕ СОФИИ АЛЕКСИЕВНЕ [387]