Том 1 (XI-XII века)

Якоже и властелинъ града того, видевъ отрока въ такомь съмерении и покорении суща, вълюби и́ зело и повеле же ему, да пребываеть у него въ цьркви, въдасть же ему и одежю светьлу, да ходить въ ней. Блаженый же Феодосий пребысть въ ней ходя мало дьний, яко некую тяжесть на собе нося, тако пребываше. Таче съньмъ ю, отдасть ю нищимъ, самъ же въ худыя пърты обълкъся, ти тако хожаше. Властелинъ же, видевы и́ тако ходяща, и пакы ину въдасть одежю, вящьшю пьрвыя, моля и́, да ходить въ ней. Онъ же съньмъ и ту отъда. Сице же многашьды сътвори, якоже судии то уведевъшю, большимь начатъ любити и́, чюдяся съмерению его. По сих же божьствьный Феодосий шедъ къ единому от кузньць, повеле ему железо съчепито съковати, иже и възьмъ и препоясася имь въ чресла своя, и тако хожаше. Железу же узъку сущю и грызущюся въ тело его, онъ же пребываше, яко ничсоже скьрбьна от него приемля телу своему.

Таче, яко ишьдъшемъ дьньмъ мъногомъ и бывъшю дьни праздьничьну, мати его начать велети ему облещися въ одежю светьлу на служение вьсемъ бо града того вельможамъ, въ тъ дьнь възлежащемъ на обеде у властелина. И повелено бе убо блаженууму Феодосию предъстояти и служити. И сего ради поущашети и́ мати его, да облечеться въ одежю чисту, наипаче же якоже и слышала бе, еже есть сътворилъ. Якоже ему облачащюся въ одежю чисту, простъ же сы умъмь неже блюдыйся ея. Она же прилежьно зьряаше, хотящи истее видети, и се бо виде на срачици его кръвь сущю от въгрызения железа. И раждьгъшися гневъмь на нь, и съ яростию въставъши и растьрзавъши сорочицю на немь, биющи же и́, отъя железо от чреслъ его. Божий же отрокъ, яко ничьсоже зъла приятъ от нея, обълкъся и, шедъ, служаше предъ възлежащими съ вьсякою тихостию.

Таче по времени пакы некоторемь слыша въ святемь еуангелии Господа глаголюща: «Аще кто не оставить отьца или матере и въ следъ мене не идеть, то несть мене достоинъ».[929] И пакы: «Придете къ мъне вьси тружающеися и обременении, и азъ покою вы. Възьмете ярьмъ мой на ся и научитеся от мене, яко крътъкъ есмь и съмеренъ сьрдьцьмь, и обрящете покой душамъ вашимъ».[930] Си же слышавъ богодъхновеный Феодосий и раждьгъся божьствьною рьвьностию и любъвию, и дышаниемь Божиемь, помышляаше, како или кде пострещеся и утаитися матере своея. По сълучаю же Божию отъиде мати его на село, и якоже пребыти ей тамо дьни мъногы. Блаженый же, радъ бывъ, помоливъся Богу, и изиде отай из дому, не имый у себе ничьсоже, разве одежа, ти мало хлеба немощи деля телесьныя. И тако устрьмися къ Кыеву городу, бе бо слышалъ о манастырихъ ту сущиихъ. Не ведый же пути, моляшеся Богу, дабы обрелъ съпутьникы, направляюща и́ на путь желания. И се по приключаю Божию беша идуще путьмь темь купьци на возехъ съ бремены тяжькы. Уведевъ же я блаженый, яко въ тъ же градъ идуть, прослави Бога и идяшеть въследъ ихъ издалеча, не являяся имъ. И онемъ же ставъшемъ на нощьнемь становищи, блаженый же не доида, яко и зьреимо ихъ, ту же опочивааше, единому Богу съблюдающю и́. И тако идый, трьми неделями доиде прежереченааго града. Егда же пришедъ и обьходи вся манастыря, хотя быти мнихъ и моляся имъ, да приятъ ими будеть. Они же видевъше отрока простость и ризами же худами облечена, не рачиша того прияти. Сице же Богу изволивъшю тако, да на место, идеже бе Бъгъмь от уности позъванъ, на то же ведешеся.

Тъгда же бо слышавъ о блаженемь Антонии,[931] живущиимь въ пещере, и окрилатевъ же умъмь устрьмися къ пещере. И пришьдъ къ преподобьнуму Антонию, его же видевъ и, падъ, поклонися ему съ сльзами, моляся ему, да бы у него былъ. Великый же Антоний казаше и глаголя: «Чадо, видиши ли пещеру сию, скьрбьно суще место и теснейше паче инехъ местъ. Ты же унъ сый, якоже мню, и не имаши трьпети на месте семь скърби». Се же не тъкмо искушая и́ глаголаше, нъ и прозорочьныма очима прозря, яко тъ хотяше възградити самъ местъ то и манастырь славьнъ сътворити на събьрание множьству чьрньць. Богодъхновеный же Феодосий отвеща ему съ умилениемь: «Вежь, чьстьный отче, яко проразумьникъ всячьскыихъ Богъ приведе мя къ святости твоей и спасти мя веля, темьже, елико ми велиши сътворити, сътворю». Тъгда глагола ему блаженый Антоний: «Благословенъ Богъ, чадо, укрепивый тя на се тьщание, и се место — буди въ немь». Феодосий же, пакы падъ, поклонися ему. Таче благослови и́ старьць и повеле великому Никону[932] острещи и́, прозвутеру тому сущю и чьрноризьцю искусьну, иже и поимъ блаженаго Феодосиа и по обычаю святыихъ отьць остригы и облече и́ въ мьнишьскую одежю.