Том 1 (XI-XII века)

Мы публикуем текст «Сказания о Борисе и Глебе» по списку Успенского сборника (по изд.: Успенский сборник XII—XIII вв. Издание подготовили О. А. Князевская, В. Г. Демьянов, М. В. Ляпон. М., 1971), но в том составе, который, по гипотезе С. А. Бугославского, это произведение имело в своем первоначальном виде, т. е. без «Сказания о чудесах», но сохраняя приложенную после похвалы Борису и Глебу, перед «Сказанием о чудесах», статью «О Борисе, какъ бе възъръм». Исправления ошибок и восполнение пропусков делаются по спискам «Сказания», входящим в редакцию Успенского сборника (по изд. Бугославского).

ЖИТИЕ ФЕОДОСИЯ ПЕЧЕРСКОГО

Подготовка текста, перевод и комментарии О. В. Творогова

ОРИГИНАЛ

ЖИТИЕ ПРЕПОДОБНААГО ОТЬЦА НАШЕГО ФЕОДОСИЯ, ИГУМЕНА ПЕЧЕРЬСКАГО

Господи, благослови, отьче!

Благодарю тя, владыко мой, Господи Исусе Христе, яко съподобилъ мя еси недостойнааго съповедателя быти святыимъ твоимъ въгодьникомъ, се бо испьрва писавъшю ми о житие и о погублении и о чюдесьхъ святою и блаженою страстотрьпьцю Бориса и Глеба,[913] понудихъ ся и на другое исповедание приити, еже выше моея силы, ему же и не бехъ достоинъ — грубъ сы и неразумичьнъ, къ симъ же яко и не бехъ ученъ никоеиждо хытрости, нъ въспомянухъ, Господи, слово твое, рекъшее: «Аще имате веру яко и зьрно горущьно и речете горе сей: преиди и въврьзися въ море, и абие послушаеть васъ».[914] Сина уме азъ грешьный Нестерь приимъ и оградивъся верою и упованиемь, яко вься възможьна отъ тебе суть, начатъкъ слову списания положихъ, еже о житии преподобнааго отьца нашего Феодосия, бывъша игумена манастыря сего святыя владычице нашея Богородице, его же и день усъпение ныне праздьнующе память творимъ. Се же якоже, о братие, въспоминающю ми житие преподобнааго, не сущю же съписану ни отъ кого же, печалию по вься дни съдрьжимъ бехъ и моляхъся Богу, да съподобить мя по ряду съписати о житии богоносьнааго отьца нашего Феодосия. Да и по насъ сущеи чьрноризьци, приимьше писание и почитающе и́, тако видяще мужа доблесть, въсхвалять Бога, и въгодника его прославляюще, на прочия подвигы укрепляються, наипаче же яко и въ стране сей такъ сий мужь явися и угодьникъ Божий. О семь бо и самъ Господь прорече: «Яко мнози приидуть отъ въстокъ и западъ и възлягуть съ Авраамъмь и съ Исакъмь и Ияковъмь въ царствии небесьнемь»[915] и пакы: «Мнози будуть последьнии пръвии»,[916] ибо сии последьнии вящии прьвыхъ отьць явися, житиемь бо подражая святааго и пьрвааго начальника чьрьньчьскууму образу, великааго меню Антония[917] чьрньчьскууму образу. И се же чюдьнее, якоже пишеть въ отьчьскыихъ кънигахъ: «Слабу быти последьнюму роду»; сегоже Христось въ последьниимь роде семь такого себе съдельника показа и пастуха инокыимъ, бе бо измолода житиемь чистъмь украшенъ, добрыими делесы, верою же и съмыслъмь паче. Его же ныне отьсюду уже начьну съповедати еже отъ уны вьрсты житие блаженааго Феодосия.

Нъ послушайте, братие, съ вьсяцемь прилежаниемь, испълнь бо есть пользы слово се вьсемъ послушающиимъ. Молю же вы, о възлюблении: да не зазьрите пакы грубости моей, съдрьжимъ бо сый любъвию еже къ преподобьнууму, сего ради окусихъся съписати вься си яже о святемь, къ симъ же и блюдый, да не къ мне речено будеть: «Зълый рабе ленивый, подобаше ти дати сребро мое тържьникомъ, и азъ пришед быхъ съ лихвою истязалъ е».[918] Темьже якоже и несть лепо, братие, таити чюдесъ Божиих, наипаче Богу рекъшюуму ученикомъ своимъ яко: «Еже глаголю вамъ въ тьме, поведите на свете и еже въ уши слышасте, проповедите въ домъхъ».[919] Си на успехъ и на устроение беседующимъ съписати хощю, и о сихъ Бога славяще, мьзды отдание приимете. Хотящю же ми исповедати начати, преже молюся Господеви, глаголя сице: «Владыко мой, Господи вьседрьжителю, благымъ подателю, отьче Господа нашего Исус Христа, прииди на помощь мне и просвети сьрьдце мое на разумение заповедий твоихъ и отвьрзи устьне мои на исповедание чюдесъ твоихъ и на похваление святааго въгодника твоего; да прославиться имя твое, яко ты еси помощьникъ всемъ уповающимъ на тя въ векы. Амин».

Градъ есть отстоя отъ Кыева, града стольнааго, 50 попьрищь, именемь Васильевъ[920]. Въ томь беста родителя святаго въ вере крьстияньстей живуща и всячьскыимь благочьстиюмь украшена. Родиста же блаженаго детища сего, таче въ осмый дьнь принесоста и́ къ святителю Божию, якоже обычай есть крьстияномъ, да имя детищю нарекуть. Прозвутеръ же, видевъ детища и сьрьдьчьныма очима прозьря, еже о немь, яко хощеть измлада Богу датися, Феодосиемь того нарицаеть.[921] Таче же, яко и минуша 40 дьний детищю, крьщениемь того освятиша. Отроча же ростяше, кърмимъ родителема своима, и благодать Божия съ нимь, и Духъ Святый измлада въселися въ нь.