Том 1 (XI-XII века)

Како верова? Како разгореся въ любовь Христову? Како въселися въ тя разумъ выше разума земленыихъ мудрець, еже Невидимаго възлюбити и о небесныихъ подвигнутися? Како възиска Христа, како предася ему? Повеждь намъ, рабомъ твоимъ, повеждь, учителю нашь! Откуду ти припахну воня Святааго Духа? Откуду испи памяти будущая жизни сладкую чашу? Откуду въкуси и виде, «яко благъ Господь»?[146]

Не видилъ еси Христа, не ходилъ еси по немь, како ученикъ его обретеся? Ини, видевше его, не вероваша; ты же, не видевъ, верова.[147] Поистине бысть на тебе блаженьство Господа Исуса, реченое къ Фоме: «Блажени не видевше и веровавше»[148]. Темже съ дрьзновениемь и несуменно зовемь ти: о блажениче! — самому тя Спасу нарекшу. Блаженъ еси, яко верова къ нему и не съблазнися о немь, по словеси его нелъжнууму: «И блаженъ есть, иже не съблазниться о мне».[149] Ведущеи бо законъ и пророкы распяша и́; ты же, ни закона, ни пророкъ почитавъ, Распятому поклонися.

Како ти сердце разверзеся? Како въниде въ тя страхъ Божии? Како прилепися любъви его? Не виде апостола,пришедша въ землю твою и нищетою своею и наготою, гладомъ и жаждею сердце твое на съмерение клоняща. Не виде бесъ изъгонимъ именемь Исусовомъ Христовомъ, болящиихъ съдравеють, немыихъ глаголють, огня на хладъ прилагаема, мертвыих въстають.[150] Сихъ всехъ не видевъ, како верова?

Дивно чюдо! Ини царе и властеле, видяще вся си, бывающа от святыихъ мужь, не вероваша, нъ паче на мукы и страсти предаша ихъ. Ты же, о блажениче, безъ всехъ сихъ притече къ Христу, токмо от благааго съмысла и остроумиа разумевъ, яко есть Богъ единъ творець невидимыимъ и видимыим, небесныимъ и земленыимъ, и яко посла въ миръ спасениа ради възлюбенаго Сына своего. И си помысливъ, въниде въ святую купель. И еже инемь уродьство мнится, тобе сила Божиа въменися.[151]

Къ сему же кто исповесть многыа твоа нощныа милостыня и дневныа щедроты, яже къ убогыимъ творяаше, къ сирыимъ, къ болящиимъ, къ дължныимъ, къ вдовамъ и къ всемь требующимъ милости? Слышалъ бо бе глаголъ, глаголаныи Данииломъ къ Науходоносору: «Съветъ мои да будеть ти годе, царю Науходоносоре, грехы твоа мшюстинями оцести и неправды твоа щедротами нищиихъ».[152] Еже слышавъ ты, о честьниче, не до слышаниа стави глаголаное, нъ деломъ съконча,[153] просящиимъ подаваа, нагыа одевая, жадныа и алчныа насыщая, болящиимъ всяко утешение посылаа, должныа искупая, работныимъ свободу дая.

Твоа бо щедроты и милостыня и ныне въ человецехъ поминаемы суть, паче же пред Богомъ и ангеломъ его. Ея же ради доброприлюбныа Богомъ милостыня, много дръзновение имееши къ нему, яко присныи Христовъ рабъ. Помагаеть ми словеси рекыи: «Милость хвалится на суде».[154] И: «Милостыни мужу, акы печать съ нимъ».[155] Вернее же самого Господа глаголъ: «Блажени милостивии, яко ти помиловани будуть».[156]

Ино же, яснее и вернее послушьство приведемь о тебе от Святыихъ писании, реченое от Иакова апостола, яко: «Обративыи грешника от заблуждениа пути его спасеть душу от смерти и покрыеть множество греховъ».[157]

Да аще единого человека обративъшууму толико възмездие от благааго Бога, то каково убо спасение обрете, о Василие? Како бремя греховное расыпа, не единого обративъ человека от заблуждениа идольскыа льсти, ни десяти, ни града, нъ всю область сию.

Показаеть ны и уверяеть самъ Спасъ Христос, какоя тя славы и чьсти сподобилъ есть на небесехъ, глаголя: «Иже исповесть мя пред человекы, исповемь и́ и азъ пред Отцемь моим, иже есть на небесех».[158] Да аще исповедание приемлеть о собе от Христа къ Богу Отцу исповедавыи его токмо пред человекы, колико ты похваленъ от него имаши быти, не токмо исповедавъ, яко «Сынъ Божии есть Христос»,[159] нъ и веру его уставль, не въ единомь съборе, нъ по всеи земли сеи, и церкви Христови поставль, и служителя ему въведъ.

Подобниче великааго Коньстантина,[160] равноумне, равнохристолюбче, равночестителю служителемь его! Онъ съ святыими отци Никеискааго Събора[161] закон человекомъ полагааше, ты же съ новыими нашими отци епископы сънимаяся чясто, съ многымъ съмерениемь съвещаваашеся, како въ человецехъ сихъ ново познавшиихъ Господа законъ уставити. Онъ въ елинехъ и римлянех царьство Богу покори, ты же — в Руси: уже бо и въ онехъ и въ насъ Христос царемь зовется. Онъ съ материю своею Еленою[162] крестъ от Иерусалима принесъша[163] и по всему миру своему раславъша, веру утвердиста, ты же съ бабою твоею Ольгою принесъша крестъ от новааго Иерусалима, Константина града, и сего по всеи земли своеи поставивша, утвердиста веру. Егоже убо подобникъ сыи, съ темь же единоя славы и чести обещьника сътворилъ тя Господь на небесех благовериа твоего ради, еже име въ животе своемь.

Добръ послухъ благоверию твоему, о блажениче, святаа церкви Святыа Богородица Мариа,[164] юже създа на правоверьнеи основе, идеже и мужьственое твое тело ныне лежит, жида трубы архангельскы.[165]