Том 1 (XI-XII века)

и еще: «От въстокъ и до западъ хвално имя Господне. Высокъ надъ всеми языкы Господь, надъ небесы слава его»;[129]

«По имени твоему, Боже, тако и хвала твоа на коньцих земля»;[130]

«Услыши ны, Боже, Спасителю нашь, упование всемъ концемь земли и сущиимъ въ мори далече»;[131]

и: «Да познаемь на земли путь твои и въ всехъ языцех спасение твое»;[132]

и: «Царие земьстии и вси людие, князи и вси судии земьскыи, юноше и девы, старци съ юнотами да хвалять имя Господне»;[133]

и Исаино: «Послушаите мене, людие мои, глаголеть Господь, и царе къ мне вънушите, яко законъ от мене изидеть и судъ мои светъ странамъ, приближается скоро правда моа, и изыдеть, яко светъ, спасение мое; мене острови жидуть и на мышьцю мою страны уповають».[134]

Хвалить же похвалныими гласы Римьскаа страна Петра и Паула, имаже вероваша въ Исуса Христа, Сына Божиа; Асиа и Ефесъ, и Патмъ Иоанна Богословьца, Индиа Фому, Египетъ Марка. Вся страны и гради, и людие чтуть и славять коегождо ихъ учителя, иже научиша я́ православнеи вере. Похвалимъ же и мы, по силе нашеи, малыими похвалами великаа и дивнаа сътворьшааго нашего учителя и наставника, великааго кагана нашеа земли Володимера,[135] вънука старааго Игоря,[136] сына же славнааго Святослава,[137] иже въ своа лета владычествующе, мужьствомъ же и храборъствомъ прослуша въ странахъ многах, и победами и крепостию поминаются ныне и словуть. Не въ худе бо и неведоме земли владычьствоваша, нъ въ Руське, яже ведома и слышима есть всеми четырьми конци земли.

Сии славныи от славныихъ рожься, благороденъ от благородныих, каганъ нашь Влодимеръ, и възрастъ и укрепевъ от детескыи младости, паче же възмужавъ, крепостию и силою съвершаяся, мужьствомъ же и съмыслом предъспеа. И единодержець бывъ земли своеи, покоривъ подъ ся округъняа страны, овы миромъ, а непокоривыа мечемь.

И тако ему въ дни свои живущю и землю свою пасущу правдою, мужьствомь же и съмысломъ, приде на нь посещение Вышняаго, призре на нь всемилостивое око благааго Бога, и въсиа разумъ въ сердци его, яко разумети суету идольскыи льсти и възыскати единого Бога, сътворьшааго всю тварь видимую и невидимую.

Паче же слышано ему бе всегда о благоверьнии земли Гречьске, христолюбиви же и сильне верою, како единого Бога въ Троици чтуть и кланяются, како въ них деются силы и чюдеса и знамениа, како церкви людии исполнены, како веси и гради благоверьни вси въ молитвах предстоять, вси Богови престоять. И си слышавъ, въждела сердцемь, възгоре духомъ, яко быти ему христиану и земли его.

Еже и бысть, Богу тако изволившу и възлюбившу человечьское естьство. Съвлече же ся убо каганъ нашь и съ ризами ветъхааго человека,[138] съложи тленнаа, оттрясе прахъ невериа и вълезе въ святую купель. И породися от Духа и воды,[139] въ Христа крестився, въ Христа облечеся,[140] и изиде от купели белообразуяся, сынъ бывъ нетлениа, сынъ въскрешениа.[141] Имя приимъ вечно, именито на роды и роды, Василии, имже написася въ книгы животныа[142] въ вышниимъ граде и нетленнеимъ Иерусалиме.[143]

Сему же бывьшу, не доселе стави благовериа подвига, ни о том токмо яви сущую въ немь къ Богу любовь. Нъ подвижеся паче, заповедавъ по всеи земли и крьститися въ имя Отца и Сына и Святаго Духа, и ясно и велегласно въ всех градех славитися Святеи Троици, и всемъ быти христианомъ малыим и великыимъ, рабомъ и свободныим, уныим и старыим, бояромъ и простыим, богатыим и убогыимъ. И не бы ни единого же противящася благочестному его повелению, да аще кто и не любовию, нъ страхом повелевшааго крещаахуся, понеже бе благоверие его съ властию съпряжено.

И въ едино время вся земля наша въслави Христа съ Отцемь и съ Святыимъ Духомъ. Тогда начатъ мракъ идольскыи от нас отходити, и зоре благовериа явишася; тогда тма бесослуганиа погыбе, и слово евангельское землю нашю осиа. Капища разрушаахуся, и церкви поставляахуся, идолии съкрушаахуся, и иконы святыих являахуся, беси пробегааху, крестъ грады свящаше.

Пастуси словесныихъ овець Христовъ епископи сташа пред святыимъ олтаремь, жертву бескверньную възносяще; попове и диакони, и весь клиросъ, украсиша и въ лепоту одеша святыа церкви. Апостольскаа труба и евангельскы громъ вси грады огласи; темианъ, Богу въспущаемь, въздух освяти. Манастыреве на горах сташа, черноризьци явишася. Мужи и жены, и малии, и велиции, вси людие, исполнеше святыя церкви, въславиша, глаголюще: «Единъ святъ, единъ Господь, Исус Христос, въ славу Богу Отцу, аминь![144] Христос победи! Христос одоле! Христос въцарися! Христос прославися! Великъ еси, Господи, и чюдна дела твоа![145] Боже нашь, слава тебе!».

Тебе же како похвалимъ, о честныи и славныи въ земленыих владыках, премужьственыи Василие? Како доброте твоей почюдимся, крепости же и силе? Каково ти благодарие въздадимъ, яко тобою познахомъ Господа и льсти идольскыа избыхомъ, яко твоимъ повелениемь по всеи земли твоеи Христос славится? Ли что ти приречемь, христолюбче, друже правде, съмыслу место, милостыни гнездо?