Русский Мисопогон. Петр I, брадобритие и десять миллионов «московитов»

Приложение № 4 [1692−1693 гг.] – Проект Окружного послания патриарха Адриана с поучением о пагубности брадобрития и предписанием отлучения нарушителей заповеди брадоношения от Церкви (с правкой Евфимия Чудовского) [1019]

(Л. 437) Адриан, милостию Божиею архиепископ царствующаго великаго града Москвы и всеа Росии и всех Северных стран патриарх сыновом мерности нашея и братием по духу, всем православным христианом желаю здравия, спасения, и всяких благ податися от Господа[1020] Бога.

Бог Всеблагий в Троице, поемый Отец, Сын и Святый Дух[1021], мудростию Своею неисказанною сотвори мир и созда человека по Образу Своему и по подобию, украсив его внешнею всякою добротою, еще же и внутреннею – разумом[1022] и словом паче прочих[1023] животных; мужа и жену сотвори тыя, положив разнство в виде[1024] между ими, яко знамение некое видное[1025]: мужу убо благолепие, яко началнику, браду израсти; жене же, яко несовершенней, но подначалней, онаго благолепия не даде, яко да будет подчинна: зрящи мужа своего красоту, себе же лишенну тоя красоты[1026] и совершенства, да будет смиренна (Л. 437 об.) всегда и покорна[1027].

Потом, закон дая, повеле Бог мужу красоту свою блюсти, глаголя[1028]: «Аз Господь Бог ваш. Да не сотворите сисон (сиречь кудри)[1029] от власов главы вашея, ниже тлите (или брийте[1030])[1031] вид брады вашея»[1032].

Человецы же, удобопоползновеннии суще к преслушанию заповеди Божия, отступивше от Бога, начаша служите идолом, ихже быша жерцы остриженыя[1033] брады имуще ко угождению демоном, яко сущия в Вавилоне[1034], о нихже повествует Варух пророк[1035]. И оттуду навыкоша мужие младоумнии власы шарити, и вити, и плести, и[1036] кудрити, и растрясати, и растрепывати[1037], брады брити, а жены – лица вапами натирати: обои́ ко угождению блудному творяще[1038] сия. И тако пребыша язычници многая времена и до Пришествия во Плоти Христа Бога, егда и божествении апостоли, отвождаху человеки от идолослужения[1039] в познание Христово, учаще и запрещающе, паче христианом (Л. 438) сущим, мужем – брадобритие, женам же – лиц шароутворение ради хранения чистоты телесныя, яко свидетелствует равноапостолный муж Климент Ромский[1040], ученик[1041] святаго апостола Петра, в «Завещаниих святых апостолов», глаголющих[1042]: «Не подобает тлити (рекше брити) брады и образ мужа изменяти, паче естества»[1043].

По сих по многих временех в еретицех прониче сей злообычай[1044], яко повествуется, яко Константин Копроним, еретик, сие узакони[1045] своим еретиком, угодником[1046] – брады брити, яко знамение некое даде им, да тем разнственни от православных будут, яко еретичестии слузи суть, Копронимовы же угодницы, имже брады побриты[1047].

И древнии убо еллини[1048], привождаху дети своя на жертву демоном, не стригуще власов на главах их[1049]; тии же по мертвых брады своя брияху[1050].

(Л. 438 об.) О велие зло! Человецы, создании по Образу Божию, измениша доброту здания Его и зрак свой мужеский обругаша, уподобляющеся женам блудовидным ради угождения сквернаго![1051] Или, паче рещи, подобящеся безсловесным некиим[1052]: тии бо усы простерты имут, брад же не имут, тако и человецы младоумнии или, паче свойственнее рещи, безумнии, изменивше образ мужа Богозданный[1053], брады отрезающе[1054]. Таковии суть безчестнии человецы и неблагоразумнии, по псаломнику: «Человек, в чести сый не разуме, приложися скотом несмысленным»[1055].