Том 1 (XI-XII века)

В лето 6453. Ркоша дружина Игореви: «Отроци Свенделжи[338] изоделеся суть оружьемь и порты, а мы нази. И поиди, княже, с нами в дань, да и ты добудешь и мы». И послуша ихъ Игорь, иде в Дерева в дань, и примысляше къ первой дани, и насиляше имъ и мужи его. И возмя дань и поиде въ свой городъ. Идущю же ему въспять, размысли, рече дружине своей: «Идете вы с данью домови, а язъ възвращюся и похожю еще». И пусти дружину свою домови, с маломъ же дружины възвратися, желая болшая именья. Слышавше же древляне, яко опять идеть, съдумавше древляне съ княземъ своимъ Маломъ и ркоша: «Аще ся въвадить волкъ въ овце, то относить по единой все стадо, аще не убьють его; тако и сий, аще не убьем его, то вси ны погубить», И послаша к нему, глаголюще: «Почто идеши опять? Поималъ еси вьсю дань». И не послуша ихъ Игорь, и шедше из города Искоростеня[339] противу древляне и убиша Игоря[340] и дружину его, бе бо ихъ мало. И погребенъ бысть Игорь, и есть могила его у Искоростиня города в Деревехъ и до сего дни.

Ольга же бяше в Киеве съ сыномъ своимъ детьском Святославомъ, и кормилець бе его Асмудъ, и воевода бе Свинделдъ, — то же отець Мьстишинъ. Ркоша же деревляне: «Се князя рускаго убихомъ, поимемъ жену его Олгу за князь свой Малъ и Святослава, и створимъ ему, якоже хощемъ». И послаша деревляне лучьшии мужи свои, числомъ 20, в лодьи къ Ользе. И присташа подъ Боричевом въ лодьи. Бе бо тогда вода текущи возле горы Киевьскыя, и на Подоле не седяхуть людье, но на горе. Городъ же бяше Киевъ, идеже есть ныне дворъ Гордятинъ и Никифоровъ, а дворъ кьняжь бяше в городе, идеже есть ныне дворъ Воротиславль и Чюдинь, а перевесище бе вне города. Дворъ теремный и другый — идеже есть дворъ демесниковъ[341] за святою Богородицею, надъ горою. Бе бо ту теремъ каменъ. И поведаша Олзе, яко деревляни придоша, и възва Ольга к собе и рече имъ: «Добре, гостье, приидоша?» И ркоша древляне: «Придохомъ, княгини». И рече имъ Ольга: «Да глаголите, что ради приидосте семо?» И ркоша деревляни: «Посла ны Деревьская земля, ркущи сице: мужа твоего убихомъ, бяшеть бо мужь твой яко волкъ, въсхыщая и грабя, а наши князи добри суть, иже роспасли суть Деревьскую землю, да иди за нашь князь за Малъ» — бе бо ему имя Малъ, князю деревьскому. Рече же имъ Олга: «Люба ми есть речь ваша, уже мне своего мужа не кресити, но хощю вы почтити наутьрея пред людми своими, а ныне идете в лодью свою и лязьте в лодьи величающеся. Азъ утро пошлю по вы, вы же речете: “Не едемъ ни на конехъ, ни пеши идемъ, но понесете ны в лодьи”, и възьнесуть вы в лодьи». И отпусти я в лодью. Ольга же повеле ископати яму велику и глубоку на дворе теремьскомъ вне города. И заутра Ольга, седящи в тереме, посла по гости, и приидоша к нимъ, глаголюще: «Зоветь вы Ольга на честь велику». Они же ркоша: «Не едемъ ни на конехъ, ни на возех, ни пешь идемъ, но понесите ны в лодьи». Ркоша же кияне: «Намъ неволя: князь нашь убитъ, а княгини наша хощеть за вашь князь», и понесоша я в лодьи. Они же седяху в перегбех въ великихъ сустогахъ[342] гордящеся. И принесоша я на дворъ къ Ользе, и, несъше я, и вринуша въ яму и съ лодьею. И приникши Олга и рече имъ: «Добьра ли вы честь?» Они же ркоша: «Пуще ны Игоревы смерти». И повеле засыпати я живы, и посыпаша я.

И пославши Олга къ деревляном, рече: «Да аще мя право просите, то пришлите къ мне мужи нарочиты, да въ велице чести поиду за вашь князь, еда не пустять мене людье киевьсции». Се слышавше, древляне изъбраша лучьшая мужи, иже держать Деревьскую землю, и послаша по ню. Деревляномъ же пришедъшим, повеле Олга мовницю створити, ркущи сице: «Измывшеся, придета къ мне». Они же пережьгоша мовницю, и влезоша древляне и начаша мытися, и запроша мовницю о них, и повеле зажечи я от дверий, и ту изгореша вси.

И посла къ деревляном, ркущи сице: «Се уже иду к вамъ, да пристройте меды мьногы у города, идеже убисте мужа моего, да поплачюся надъ гробомъ его, и створю трызну мужю моему». Они же, слышавше, свезоша меды многы зело. Олга же, поемши мало дружине и легъко идущи, приде къ гробу его и плакася по мужи своемъ. И повеле людем съсути могилу велику, и, яко съспоша, повеле трызну творити. Посем седоша деревляне пити, и повеле Олга отроком своимъ служити передъ ними. И ркоша деревляне къ Олзе: «Кде суть друзе наши, ихъже послахомъ по тя?» Она же рече: «Идуть по мне съ дружиною мужа моего». И яко упишася деревляне, повеле отрокомъ своим пити на ня, а сама отиде прочь и потомъ повеле отроком сечи я, и исъсекоша ихъ 5000. А Ольга възвратися къ Киеву и пристрои воя на прокъ ихъ.[343]

Начало княженья Святославьля.