Том 1 (XI-XII века)

И отрядивъ ̀я, вземъ Псалтырю, в печали разгнухъ я́, и то ми ся выня: «Вскую печалуеши, душе? Вскую смущаеши мя?»[1040] и прочая. И потомь собрах словца си любая, и складохъ по ряду, и написах. Аще вы последняя не люба, а передняя приимайте.

«Вскую печална еси, душе моя? Вскую смущаеши мя? Уповай на Бога, яко исповемся ему».[1041] «Не ревнуй лукавнующимъ, ни завиди творящимъ безаконье, зане лукавнующии потребятся, терпящии же Господа, — ти обладають землею».[1042] И еще мало: «И не будеть грешника; взищеть места своего, и не обрящеть. Кротции же наследять землю, насладяться на множьстве мира. Назираеть грешный праведнаго, и поскрегчеть на нь зубы своими; Господь же посмеется ему и прозрить, яко придеть день его.

Оружья извлекоша грешьници, напряже лукъ свой истреляти нища и убога, заклати правыя сердцемь. Оружье ихъ внидеть в сердця ихъ, и луци ихъ скрушатся. Луче есть праведнику малое, паче богатства грешных многа. Яко мышца грешных скрушится, утвержаеть же праведныя Господь. Яко се грешници погыбнут; праведныя же милуя и даеть. Яко благословящии его наследят землю, кленущии же его потребятся. От Господа стопы человеку исправятся. Егда ся падеть, и не разбьеться, яко Господь подъемлеть руку его. Унъ бех, и сстарехся, и не видехъ праведника оставлена, ни семени его просяща хлеба. Весь день милует и в заимъ даеть праведный, и племя его благословлено будет. Уклонися от зла, створи добро, взищи мира и пожени, и живи в векы века».[1043]

«Внегда стати человекомъ, убо живы пожерли ны быша; внегда прогневатися ярости его на ны, убо вода бы ны потопила».[1044]

«Помилуй мя, Боже, яко попра мя человекъ, весь день боряся, стужи ми. Попраша мя врази мои, яко мнози борющиися со мною свыше».[1045] «Возвеселится праведник, и егда видить месть; руце свои умыеть в крови грешника. И рече убо человекъ: аще есть плодъ праведника, и есть убо Богъ судяй земли».[1046] «Измий мя от врагъ моихъ, Боже, и от встающих на мя отьими мя. Избави мя от творящих безаконье, и от мужа крови спаси мя; яко се уловиша душю мою».[1047] «И яко гневъ въ ярости его, и животъ в воли его; вечеръ водворится плачь, а заутра радость».[1048] «Яко лучьши милость твоя, паче живота моего, и устне мои похвалита тя. Тако благословю тя в животе моемь, и о имени твоемь въздею руце мои»[1049]. «Покры мя от соньма лукаваго и от множьства делающих неправду».[1050] «Възвеселитеся вси праведнии сердцемь. Благословлю Господа на всяко время, воину хвала его»,[1051] и прочая.

Якоже бо Василий учаше,[1052] собрав ту уноша: душа чисты, нескверньни, телеси худу, кротку беседу и в меру слово Господне: «Яди и питью бесъ плища велика быти, при старых молчати, премудрыхъ слушати, старейшимъ покарятися, с точными и меншиими любовь имети; без луки беседующе, а много разумети; не свереповати словомь, ни хулити беседою, не обило смеятися, срамлятися старейших, к женам нелепымъ не беседовати, долу очи имети, а душю горе, пребегати; не стрекати учить легкых власти, ни в кую же имети, еже от всех честь. Аще ли кто васъ можеть инемъ услети, от Бога мьзды да чаеть и вечных благъ насладится». «О Владычице Богородице! Отъими от убогаго сердца моего гордость и буесть, да не възношюся суетою мира сего» в пустошнемь семь житьи.

Научися, верный человече, быти благочестию делатель, научися, по евангельскому словеси, «очима управленье, языку удержанье, уму смеренье, телу порабощенье, гневу погубленье, помыслъ чистъ имети, понужаяся на добрая дела, Господа ради; лишаемъ — не мьсти, ненавидимъ — люби, гонимъ — терпи, хулимъ — моли, умертви грехъ». «Избавите обидима, судите сироте, оправдайте вдовицю. Придете, да сожжемъся, глаголеть Господь. Аще будут греси ваши яко оброщени, яко снегь обелю я»,[1053] и прочее. «Восияеть весна постная и цветъ покаянья, очистимъ собе, братья, от всякоя крови плотьскыя и душевныя. Светодавцю вопьюще рцемъ: “Слава тобе, Человеколюбче!”»

Поистине, дети моя, разумейте, како ти есть человеколюбець Богъ милостивъ и премилостивъ. Мы человеци, грешни суще и смертни, то оже ны зло створить, то хощемъ и́ пожрети и кровь его прольяти вскоре; а Господь нашь, владея и животомъ и смертью, согрешенья наша выше главы нашея терпить, и пакы и до живота нашего. Яко отець, чадо свое любя, бья, и пакы привлачить е к собе, тако же и Господь нашь показал ны есть на врагы победу, 3-ми делы добрыми избыти его и победити его: покаяньемъ, слезами и милостынею. Да то вы, дети мои, не тяжька заповедь Божья, оже теми делы 3-ми избыти греховъ своихъ и царствия не лишитися.

А Бога деля не ленитеся, молю вы ся, не забывайте 3-х делъ техъ: не бо суть тяжка; ни одиночьство, ни чернечьство, ни голодъ, яко инии добрии терпять, но малым деломь улучити милость Божью.