Том 1 (XI-XII века)

В лето 6623, индикта 8. Съвъкупишася братья, русции князи, Володимеръ, зовемый Монамахъ, сынъ Всеволожь, и Давыдъ Святославлиць, и Олегъ, братъ его, и сдумаша перенести мощи Бориса и Глеба: бяху бо создали церковь има камяну на похвалу и честь телесема ею и на положение. Первое же освятиша церковь камяную мая въ 1 день, в суботу, наутрия же въ 2 день перенесоша святая. И бысть сборъ великъ, сшедшюся народу съ всихъ странъ, митрополитъ Микифоръ съ всими епископы: съ Фектистомъ черниговьскымъ, с Лазаремъ переяславьскымъ, с попомъ Никитою белогородьскымъ и с Данилою гурьговьскымъ, и съ игумены: с Прохоромъ печерьскымъ, и съ Селивестромъ святаго Михаила, и Сава святаго Спаса, и Григорий святаго Андрея, Петръ кловьскый[800] и прочии игумени. И освятиша церковь каменую. И отпевшимъ имъ обедьнюю, обедаша у Ольга и пиша, и бысть учрежение велико, и накормиша убогыя и странъныя по 3 дни. И яко бысть утро, митрополитъ, епископи, игумени оболокошася у святительскыя ризы и свеща вожгоша с каделы благовоньными, и придоша к ракама святою, и взяша раку Борисову, и въставиша ́и на возила, и поволокоша ужи князи и бояре, черньцемъ упредъ идущимъ съ свещами, попомъ по нимъ идущимъ, таже игумени, таже епископи предъ ракою, а княземъ с ракою идущимъ межи воромъ. И не бе лзе вести от множества народа: поламляху воръ, а инии и покрили бяху градъ и забрала, яко страшно бяше видити народа множество. И повеле Володимеръ, режючи паволокы, орници, бель розметати народу, овъ же сребреникы метати людемъ, силно налегшимъ, а быша легко внесли въ церковь и поставиша раку среде церкви, и идоша по Глеба. Темже образомъ и сего привезоша и поставиша у брата. Распри же бывши межи Володимеромъ, и Давыдомъ и Ольгомъ: Володимеру бо хотящю я поставити среде церкви и теремъ серебрянъ поставити над нима, а Давыдъ и Олегъ хотяшета поставити я в комару, «идеже отець мой назнаменалъ», на правой стороне, идеже бяста устроене комаре има. И рече митрополитъ и епископи: «Верзите жребий, да кде изволита мученика, ту же я поставимъ». И вгодно се бысть. И положи Володимеръ свой жребий, а Давыдъ и Олегъ свой жребий на святой тряпезе, и выняся жребий Давыдовъ и Олговъ. И поставиша я в комару тою, на десней стране, кде ныне лежита. Принесена же бысть святая мученика маия въ вторый день из деревяной церкви в каменую Вышегороде. Иже еста похвала княземъ нашимъ и заступника земли Русцей, иже славу света сего попраста, а Христа узлюбиста, по стопамъ его изволиста шествовати, овчате Христове добрии, яже влекома на заколение, не противистася, ни отбежаста нужныя смерти. Темже и съ Христосомъ въцаристася у вечную радость, и даръ ицеления приемъша от Спаса нашего Иисуса Христа, неискудно подаваета недужнымъ, с верою приходящимъ въ святый храмъ ею, поборника отечьству своему. Князи же и бояре, и вси людие празноваша по три дни и похвалиша Бога и святою мученику. И тако разидошася кождо въсвояси. Володимеръ же окова раце сребромъ и златомъ и украси гроба ею, такоже и комаре покова сребромъ и златомъ, имже покланяются людие, просяще прощения грехомъ.

В се же лето бысть знамение: погибе солнце и бысть яко месяць, егоже глаголють невегласи снедаемо солнце. В се же лето преставися Олегъ Святославличь, месяца августа въ 1 день, а во вторый погребенъ бысть у святаго Спаса, у гроба отца своего Святослава. Того же лета устрои мостъ чересъ Днепръ.