Том 1 (XI-XII века)

В лето 6611. Вложи Богъ у серьдце русьскымъ княземъ мысль благу: Святополку, Володимеру, и снястася думати на Долобьске. В седе Святополкъ съ своею дружиною, а Володимеръ съ своею дружиною, а въ единомь шатре. И поча думати и начаша глаголати дружина Святополча: «Не веремя весне воевати: хочемь погубити смерды и ролью имъ». И рече Володимеръ: «Дивно ми, дружино, оже лошади кто жалуеть, еюже ореть кто, а сего чему не расмотрите, оже начьнетъ смердъ орати, и половчинъ приеха, ударить смерда стрелою, а кобылу его поиметь, а в село въехавъ, поиметь жену его и дети, и все именье его возметь. То лошади его жалуешь, а самого чему не жалуешь?» И не могоша противу ему отвещати дружина Святополча. И рече Святополкъ: «Брате! Се азъ готовъ уже». И въста Святополкъ, и рече ему Володимеръ: «То ти, брате, велико добро створиши Русьской земьли». И посласта къ Давыдови и к Олгови, глаголюща: «Поидита на половци, а любо будемь живи, любо мертви». Давыдъ же послуша ею, а Олегъ не послуша сего, вину река: «Не здоровлю». Володимерь же, целовавъ брата своего, поиде Переяславлю, а Святополкъ по немь и Давыдъ Святъславичь,[743] и Мьстиславъ, Игоревъ унукъ, Вячьславъ Ярополчичь, Ярополкъ Володимеричь.[744] И поидоша на конихъ и в лодьяхъ, и приидоша ниже порогъ, и сташа въ протолчехъ и в Хортичимъ острове. И вседоша на коне, и пешьци из лодей выседавше, идоша в поле 4 дни и придоша на Сутинъ.[745] Половци же, слышавше, яко идуть русь, и собрашася бес числа и начаша думати. И рече Урусоба: «Просимъ мира в руси, яко крепко ся имуть бити с нами, мы бо много зла створихомъ Руской земли». И реша уншии Урусобе: «Аще ся ты боиши руси, но мы ся не боимъ. Сихъ бо избивше и поидемь в землю ихъ, и приимемъ вся грады ихъ, и кто избавить ихъ от насъ?» Рустии же князи и вои моляху Бога и причистии его матери, ово кутьею, овъ же милостынею къ убогымъ, ови же манастыремъ требованья. И сице молящимъся, поидоша половьци и посла передъ собою въ стороже Алтунопу, иже словяше мужьствомъ. Тако же и русьстии князи послаша стороже свои. И въстерегоша Алтунопу, и объступиша Алтунопу и въбиша и́ и сущая с нимъ, ни единъ не избы от нихъ, но вся избиша. И поидоша полци половецьстии аки борове, и не бе перезрити ихъ, и русь поидоша противу имъ. И великий Богъ вложив жалость велику у половце, и страхъ нападе на ня и трепетъ от лица русьскыхъ вой, и дремаху саме, и конемъ ихъ не бяше спеха у ногахъ. Русь же с весельемь на конихъ и пеши потекоша к нимъ. Половци же, видивше устремленье руское на ся, не доступивше, побегоша передъ рускыми князи. Наши же погнаша, секуще я. Въ 4 месяца априля, и великое спасенье створи Богь въ тъ день благовернымъ княземъ русьскымъ и всимъ хрестьяномъ, а на врагы наше дасть победу велику. И убиша ту в полку князий 20: Урусобу, Кочия, Яросланопу, Китанопу, Кунама, Асупа, Курътыка, Ченегрепа, Сурбаря и прочая князя ихъ, а Бельдузя яша. По семь же седоша братья, победивше враги своя, и приведоша Белдузя къ Святополку, и нача Белдузь даяти на собе злато, и сребро, и коне, и скотъ. Святополкъ же посла Володимеру. И пришедшю ему, упроси его Володимеръ: «То веде, яла вы рота. Многажды бо, ходивше роте, воевасте Русьскую землю. То чему ты не училъ сыновъ своихъ и роду своего не переступати роте, но проливаете кровь хрестьяньску? Да се буди кровь твоя на главе твоей». И повели убити ̀и, и тако расекоша ̀и на уды. И по семь сняшася братья вся, и рече Володимеръ: «”Се день, иже створи Господь, възрадуемься и възвеселимься во нь”,[746] яко Богъ избавилъ ны есть от врагъ нашихъ, и покори враги наша, и “скруши главы змеевыя, и далъ есть Господь брашно ихъ намъ”».[747] Взяша бо тогда скоты, и овце, и кони, и вельблуды, и веже с добыткомъ и съ челядью, и заяша печенегы и торъкы с вежами. И приидоша в Русь с полономъ великымъ и съ славою и с победою великою усвояси.

Того же лета приидоша прузии, августа въ 1 день. Томъ же лете, того же месяца въ 18 день иде Святополкъ и сруби Гурьговъ, егоже беша пожьгле половци. Того же лета бися Ярославъ[748] с моръдвою месяца марта въ 4 день, и побеженъ бысть Ярославъ.