Вирши

ПЛАЧЬ ВТОРЫЙ ПРЕСВЕТЛАГО ЛИКА ЧАД ЦАРСКИХ

Откуду начнем ныне глаголати,
кто даст нам слово болезнь возвещати?
Дух исчезает, а язык жестеет,
обращатися во устех не умеет.
Сланые слезы уст не заливают,
во хлеба место слезы нам бывают.
Питие наше плачем растворяем,
частее стенем, неже отдыхаем.
Плоть нам изчезе, кости иссохоша,
все тела уды тольма в нас умроша.
Умре бо мати, умре мати наша,
о коль есть горка твоя смерти чаша!
Сам Христос ея не хотяше пити:
молил отца си, да ей мимо ити.
Тою ты нашу матерь напоила
и во гробном ложи спати положила.
О долгий сон твой долго ожидати,
когда воспрянет нам любимая мати.
Шесть уже седмин над нею рыдаем,
спит, а не встает. Разве тогда чаем
востанет, егда аггелстии лицы
вострубят страшно да востанут человецы.
О мати наша, пресладкая мати,
уже нам в мире тебе не видати!
Кому нас, сирых, за себе вручила,
егда к нам милость материю забыла?
Кого по вся дни будем поздравляти,
утро и вечер кого нам лобзати?
К кому с поклоном имамы ходити,
к матерней любви очи возводити?
Ты ны по вся дни матерски лобзаше,
божию страху выну поучаше.
Благонравию ты учителница,
о любезная нам родителница!
Ныне без тебе, како нам пожити,
да кого главы наши приклонити?
К отцу речеши, но отец наш милый
едва чювствует в теле своем силы,
о превелика жаля и печали!
Вси есми в силах конечно устали.
И сам отец наш утех не имеет,
како в утеху лику чад довлеет?
Сам, Господин сил, изволь силу дати
и, како прийдет, рождьшеи подражати,
Сам утешител слезы да утолит,
аще нам еще жити благоволит.
Мирская сила, людская утеха,
плачь наш толий ти не имат успеха.
Иже изволил нас опечалити,
той един силен слезы утолити.-
Убогий нища не обогащает,
слезный плачюша тож не утешает.
Все нас лишите, себе утешайте,
нам в слезах матерь погребати дайте.
Да слез реками, як Тигром глубоким,
доплывет рая в емпире широким[420].
Оттуду и нас может утешати,
о даждь то, Боже, сирым восприяти! <...>

ПЛАЧЬ ТРЕТИЙ БЛАГОРОДНЫХ ЦАРЕВЕН