Том 13 (XVI век, агиография)

Камени же текущи по водамъ ни кормилца имущи, ни кормчия, ни разумъ человечь можетъ изрещи — ниже скорбь, ни страхъ, ни туга, ни ина которая печаль, ни алчьба, ни жажда не прииде ко преподобному; но токмо пребысть моляся Богу во уме своемъ и веселяся душею. И от Римския страны по теплому морю, из негоже в реку Неву, и из Невы в Нево езеро,[17] из Нева же езера вверхъ по реце Волхову противу быстрин неизреченных, даже и до места сего камень не приста нигдеже.

И приста камень, на немъже преподобный стояше и моляшеся, при брезе великия реки нарицаемей Волхова, на месте семъ, в третию стражу нощи,[18] в сельце, еже именуемо Волховскомъ. И во время заутренняго пения начаша во граде звонити къ заутреннему пению; и услыша преподобный звонъ великъ по граду, и стояше во страсемншеивнедоумении, и от страха же начатъ быти в размышлении и во ужасе велице и чаяше, яко ко граду к Риму принесенъ бысть на камени.

Нощи же мимошедши, дневному свету уже наставшу, солнцу же возсиявшу, стекошася ко преподобному людие, иже ту живущии, и зряще на преподобнаго и дивящеся, и приидоша к нему и начаша вопрошати его о имени и о отчестве, и от коея страны прииде. Преподобному же нимало русску языку умеющу, и никотораго ответа недоумеяше отдати, но токмо имъ поклонение творяше, самъ же с камени не смеяше поступити. И пребысть ту три дни и три нощи, на камени стоя и моляся Богу. В четвертый же день преподобный помолився Богу на многъ часъ о уведении града и о людех и да бы ему послалъ Богъ таковаго человека, иже бы ему поведалъ о граде семъ и о людех. И сниде преподобный с камени и поиде во градъ в Великий Новъградъ. И обрете человека греческия земли, гостьбу Деюща, купецкий чинъ имуща, иже умеяше римскимъ и греческимъ, и русскимъ языкомъ; и узрев же преподобнаго, вопроси его о имени и о вере. Преподобный же ему поведаше имя свое и християнина себе нарече и грешна инока и недостойна аггельскаго образа. Купецъ же онъ падъ к ногама святаго, прошаше благословения от него, преподобный же благословение ему дарова и о Христе целование. Вопросившу же его преподобному о граде семъ и о людех и о вере, и о святыхъ Божиихъ церквахъ, Готфинъ[19] же преподобному поведаше вся поряду, глаголя: «Градъ сий есть Великий Новъград, людие же в немъ православную християнскую веру имуще; соборная же церковь — святая Софея Премудрость Божия; святитель же во граде семъ епископъ Никита,[20] владеющу же градомъ симъ благочестивому великому князю Мстиславу Володимеровичю Манамаху, внуку Всеволодову».[21] Преподобный же слыша от греченина сего повести сия, возрадовася душею и всесилному Богу велие благодарение воздаяше во уме своемъ. Вопроси же преподобный греченина Готфина, глаголя: «Еще мне повеждь, друже, колико разстояние от града Рима до града сего и в колико время людие путь сей преходятъ?» Онъ же ему поведа и рече: «Далняя страна есть и нуженъ путь по морю и посуху, едва преходятъ гостьбу деющии в полъгодищное время, аще кому Бог поспешитъ». Преподобному же размышлящу и дивящуся в себе о величии Божии, — како въ два дни и въ две нощи толику долготу пути преиде, и едва от слезъ удержася в то время; и поклонься ему до земли, миръ и прощение ему даровавъ.

И вниде преподобный во градъ, помолитися святей Софеи Премудрости Божии и великаго святителя Никиту видети. И видевъ церковное благолепие и чинъ и святительский санъ, вельми возрадовася душею, и помолився, и обхождаху всюду, и паки отиде на место свое. Святителю же Никите в то время никакоже явися преподобный, понеже еще не навыче словеньску и русску обычаю и языку.

И начатъ же преподобный молитися стоя на камени своемъ день и нощь, да бы ему Богъ открылъ русский языкъ. И видевъ Господь Богъ преподобнаго подвиги и труды, и начаша приходити к нему иже ту близъ живущии людие и граждане молитвы ради и благословения. И Божиимъ промысломъ преподобный въскоре от нихъ начатъ разумети и глаголати русскимъ языкомъ. Людем же вопрошающимъ его о отчестве и коея земли рождение и воспитание, и о пришествии его, преподобный же имъ никакоже поведаше о себе, токмо себе грешна именуя.

По мале же времени дойде въ слух о немъ до святителя Никиты того же Великаго Новаграда. Святитель же Никита посла по него и повеле его привести пред собя. Преподобный же во страсе в велице бывъ, еще же и радостию одержим бысть, иде ко святителю в велице смирении. Святитель же введе его в келию свою, и сотворив молитву преподобный, и рече: «Аминь». И приемлет преподобный благословение от святителя со страхомъ и с любовию, яко от Божии руки. Святитель же Никита провиде Святымъ Духомъ еже о преподобнем, иначатъ вопрошати его о отчестве и о пришествии его в Великий Новъград, и откуду и како прииде. Преподобный же святителю не хотя поведати тайны славы ради человеческия, но токмо грешна себе именуя. Святитель же Никита с великимъ прещениемъ, еще же и съ заклинаниемъ вопрошая преподобнаго и рече: «Мне ли, брате, не повеси тайны своея, а веси, яко Богъ имать открыти нашему смирению, яже о тебе, ты же преслушания судъ приимеши от Бога».