Том 1 (XI-XII века)

Блаженый же князь Володимеръ, внукъ Олжинъ, крестився самъ, и чяда своя, и всю землю Рускую крести от конца до конца, храмы идольскыя и требища всюду раскопа и посече,[834] и идолы съкруши, и всю землю Рускую и грады честными церкви украси, и памяти святыхъ въ церквахъ творяще пениемъ и молитвами, и празноваше светло праздники Господьскыя. И три трапезы поставляше: первую митрополиту съ епископы, и съ черноризце, и съ попы; вторую нищимъ и убогымъ; третью собе, и бояромъ своимъ, и всемъ мужемъ своимъ. Подобя ся царемъ святымъ, блаженый князь Володимеръ, пророку Давыду, царю Иезекею,[835] и треблаженому Иосею,[836] и великому Коньстянтину, иже избраша и изволиша Божий законъ боле всего, и послужиша Богу всемъ сердцемъ, и получиша милость Божию, и наследиша рай, и прияша царство небесное, и почиша со всеми святыми, угожьшими Богу. Тако же и блаженый князь Володимеръ, послуживъ Богу всимъ сердцемъ и всею душею. Не дивимся, възлюбленеи, аще чюдесъ не творить по смерти, мнози бо святии праведнеи не створиша чюдесъ, но святи суть. Рече бо негде о томъ святый Иоаннъ Златоустый:[837] «От чего познаемъ и разумеемъ человека свята, от чюдесъ ли, или от делъ?» И рече: «От дела познати, а не от чюдесъ, много бо и вълсви чюдесъ створиша бесовскымъ мечтаниемъ». И бяху святеи апостоли, и бяху лжии апостоли, и беша святеи пророци, и бяху лжии пророци, слугы диаволя, ино чюдо, самъ сотона преображается въ ангелъ светелъ. Но от делъ разумети святого, яко же апостолъ рече: «Плодъ духовный есть любы, радость, терпение, благоверие, благость, кротость и въздержание. На таковыхъ несть закона».[838] Блаженый же князь Володимеръ всимъ сердцемъ и всею душею Бога възлюби и заповеди его взыска и съхрани. И вся страны боахуся его и дары ему приношаху. Възвеселися, и възрадовася о Бозе и о святемъ крещении, и хваляшеся, и славяше Бога о всемъ томъ князь Володимеръ. И сице в радости смирениемъ сердца глаголаше: «Господи Владыко благый, помянулъ мя еси и привелъ мя еси на светъ, и познахъ тя, всея твари творца. Слава ти, Боже всехъ, Отче Господа Бога нашего Исуса Христа! Слава ти съ Сыномъ и Святымъ Духомъ, сице мя помиловавъ. Въ тме бяху, диаволу служа и бесомъ, но ты мя святымъ крещениемъ просвети. Акы зверь бяхъ, многа зла творях въ поганьстве и живяхъ акы скотина, но ты мя укроти и наказа своею благодатью. Слава ти, Боже в Троицы славимый, Отче, и Сыне, и Святый Душе! Троице Святая, помилуй мя, настави мя на путь твой и научи мя творити волю твою, яко ты еси Богъ мой!» Князь же Володимеръ поревнова святыхъ мужь делу и житию ихъ, и възлюби Аврамово[839] житие и подража странолюбию его, Иаковлю[840] истину, Моисееву[841] кротость, Давыдово безлобие, Констянтина, царя великого, перваго царя кристианского, того подражая правоверие, боле же всего бяше милостыню творя князь Володимеръ. Иже немощныа и старыа не можаху доити княжа двора и потребу взяти, то въ домы имъ посылаше, немощнымъ и старымъ, всяку потребу блаженый князь Володимеръ даяше. И не могу сказати многыа его милостыня, не токмо въ дому своемъ милостыню творяше, но и по всему граду, не въ Киеве единомъ, но и по всей земле Руской. И въ градехъ, и въ селехъ, везде милостыню творяше, нагыа одевая, альчныя кормя и жадныя напаяя; странныа покоя милостью; церковникы чтя, и любя, и милуя, подавая имъ требование, нищая, и сироты, и вдовица, и слепыя, и хромыя, и трудоватыя, вся милуя, и одевая, и накормя, и напаяя.

Такоже пребывающу князю Володимеру въ добрыхъ делехъ, благодать Божия просвещаше сердце его и рука Господня помогаше ему, и побежаше вся врагы своя, и бояхутся его вси. Идеже идяше, одолеваше: радимице[842] победи и дань на нихъ положи, вятичи[843] победи и дань на нихъ положи, и ятвягы[844] взя, и сребреныя болгары[845] победи, и на козары[846] шедъ, победи я и дань на них положи.

Умысли же и на греческый крадъ Корсунь[847] и сице моляшеся князь Володимеръ Богу: «Господи Боже Владыко всехъ, сего у тебе прошю: даси ми градъ, да прииму и да приведу люди кристианы и попы на всю землю, и да научать люди закону кристианскому». И послуша Богъ молитвы его, и прия градъ Корсунь, и взя съсуды церковныя, и иконы, и мощи священомученика Климента[848] и иныхъ святыхъ.

И въ ты дни беаста цари два въ Цариграде, Констянтинъ и Василий,[849] и посла къ нимъ Володимеръ, прося у нихъ сестры оженитися, да бы ся болма на кристианский законъ направилъ. И даста ему сестру свою, и дары многы присласта ему, и мощи святыхъ даста ему.

И тако добре поживе благоверный князь Володимеръ и сконча житие свое въ правоверней вере о Христе Исусе Господе нашемъ и съ благоверною Олгою. И та бо шедши къ Царюграду, приала бяше святое крещение, и много сътворивъ добра въ житии семъ предъ Богомъ, и сконча житие свое въ добрей вере, и почи съ миромъ, в руце Божии душю предавше. И еще живу сущю Володимиру князю, рать бяше от печенегъ, Володимеръ же бяше болезнию одержимъ, въ той же болезни предасть душю свою въ руце Божии.