Типикон

МРК Подобает ведати, яко аще случится отдание праздника входа пресвятыя Богородицы в неделю, оставляется возследование святаго петра, и поется, егда хощет екклисиарх. На Велицей Вечерни, на Господи воззвах, стихиры воскресны 3: И анатолиев 1: И праздника 3, глас 1: Днесь вернии: И климента 3. Слава, праздника, глас 8: По рождестве твоем: И ныне, богородичен 1, настоящаго гласа. Вход. Прокимен дне. На литии стихиры праздника: Слава, и ныне, праздника. На стиховне стихиры воскресны гласа. Слава, и ныне, праздника. На благословении хлебов, тропарь: Богородице Дево: трижды. И чтение в посланиих апостольских. А идеже всенощное не бывает, глаголем тропарь воскресн.

Слава, тропарь климента, глас 4: Иже от бога чудодействы преславно удивляя вселенныя концы мира, священный страдальче: паче естества морю, составы водам содеваеши разделение, в честней памяти твоей, всегда притекающим усердно в богозданную ти церковь, чудесным твоим мощем: и по всенародном хождении, море во едино течение чудодетельне твориши, клименте предивный, моли Христа бога спастися душам нашим.

И ныне, праздника. На Утрени, на Бог господь, тропарь воскресн, дважды. Слава, климента: И ныне, праздника. По кафисмах, седальны воскресны, с богородичны их. И чтение. И полиелей. Таже тропари: Ангельский собор: впакои гласа. И прочее воскресно. Канон воскресн со ирмосом на 4: И Богородицы на два: И праздника 1–го гласа, на 4: И климента на 4. Катавасиа, Христос раждается: По 3–й песни, кондак и икос праздника.

Таже кондак климента, глас 2. Подобен: Твердыя: божественнаго винограда священноодеянна всем лоза явися, каплющи сладость премудрости, молитвами твоими всечестне. да тебе исткану яко багряницу, песнь мысленную принесем, клименте святе: спаси рабы твоя.

И седален его. Слава, и ныне, праздника. По 6–й песни, кондак и икос воскресн. На 9–й песни поем, честнейшую: Светилен воскресн: Слава, святаго: И ныне, праздника. На хвалитех стихиры воскресны, 4, И праздника со Славным, 4, с припевы праздничными. Слава, стихира евангельская: И ныне, Преблагословенна еси: Славословие великое. Тропарь воскресн точию, ектении, и отпуст, и час 1–й. На часех, тропарь воскресн, и праздника: и ныне, богородичен часов. По Отче наш: кондак праздника, и воскресн, глаголем пременяюще. На Литургии, блаженна гласа, на 6: И праздника, песнь 9–я, на 4. По входе тропарь воскресн, и праздника, и святаго. Кондак воскресн. Слава, климента: И ныне, праздника. Прокимен гласа и праздника. Апостол, Аллилуиа, евангелие воскресное, и праздника. Причастен: Хвалите Господа с небес: Другий, Чашу спасения:

26. преподобнаго отца нашего алипиа столпника: Аллилуиа, или тропарь. Стихиры октоиха, или Богородицы 3: И святаго 3, глас 1. Подобен: Всехвальнии мученцы: На стиховне октоиха.

Тропарь, глас 1: Терпения столп был еси, ревновавый праотцем, преподобне, иову во страстех, иосифу во искушениих, и безплотных жительству сый в телеси, алипие Отче наш, моли Христа бога спастися душам нашим.

На Утрени, обычныя кафисмы: И седальны октоиха: И чтения. Оба канона октоиха: И святаго на 4, глас 5. По 3–й песни, седален, глас 4. По 6–й песни,

Кондак, глас 8. Подобен: яко начатки: яко добродетелей вину, и постников удобрение, церковь славит тя днесь, и воспевает, алипие, молитвами твоими подаждь чтущим любовию доблести твоя и борения, лютых прегрешений избавление, яко тезоименитый.

И икос. По 9–й песни, светилен: и на стиховне октоиха.

В тойже день празднуем освящению церкви святаго великомученка георгиа, яже в киеве у златых врат.

Служба его поется, идеже храм его.

Тропарь, глас 4: Днесь блажат тя мира концы божественных чудес исполншеся, и земля радуется напившися крове твоея: христоименитии же людие града киева, освящением божественнаго храма твоего, радостию возвеселишася, страстотерпче георгие, сосуде избранный святаго духа, угодниче христов. егоже моли, с верою и мольбою приходящим во святый твой храм, дати очищение грехов, умирити мир, и спасти души наша.

Кондак, глас 2. Подобен: Твердыя: божественнаго и венценоснаго великомученка Христова георгиа, на враги победу вземшаго одоления, сошедшеся верою во освященный храм восхвалим, егоже благоволи Бог создати во имя его, един во святых почиваяй.

В тойже день преставление святителя иннокентиа, перваго епискпа иркутскаго, чудотворца.

Совершается собор, идеже храм его. Тропарь, глас 3: Светильниче церкве пресветлый, озаривый лучами доброт твоих страну сию, и исцеленьми многими притекающих к раце твоей с верою бога прославивый, молим тя, святителю отче иннокентие, ограждай молитвами твоими град сей от всех бед и печали.

Кондак, глас 4: Непорочности соименнаго пастыря, проповедника веры в языцех монгольских, славу и украшение иркутския паствы, любовию восхвалим вси вернии: той бо есть хранитель страны сея и молитвенник о душах наших.

27. (:. святаго мученка иакова персянина: И преподобнаго отца нашего палладиа.

Служба его поется на повечерии.