Типикон

Не бо туне, ни якоже прилучися о святых поклонех и молитве умыслиша святии отцы, и церкви устав предаша: но разум имуще во святых поклонех и молитве, с правою мыслию плод имети будем. Но прежде о великих поклонех глаголем, яже во святую великую четыредесятницу поста, и во иныя посты творятся, еже выше вашей любви назнаменахом, от древних харатейных святых книг списавше, и от ведущих на сие искус испытахом, что глаголются великия поклоны? и кий образ имут творения, егда с молитвою святаго ефрема творятся? Ибо егда время приближится святым великим поклоном быти тогда кийждо воздев руце, и купно чувственныя очи и умныя возвести к Богу, якоже божественный апостол павел учит, к тимофею пиша: Хощу, рече, да молитвы творят мужие на всяком месте, воздеюще преподобныя руки без гнева и размышления. Таже молитву начати со умилением и страхом божиим, аще ли имать и дарование слез, и тако молится молитвою святаго ефрема, глаголя: Господи и владыко живота моего: стоя право, и неуклонно зря к Богу душевне и телесне. И совершив молитву, творит поклон великий, елико мощи главою до земли довести. Таже восклонився и став право, паки управився якоже и прежде, душевне и телесне зря к Богу молится, глаголя вторую часть молитвы святаго ефрема: дух же целомудрия: И окончав, паки творит поклон великий, якоже и прежде указася. И восклонився второе, глаголет третию часть молитвы святаго ефрема: ей Господи царю, даждь ми зрети моя прегрешения: И совершив ю, паки творит третий поклон великий. Ибо великий, не просто глаголется великий, но есть величество, елико человек может право стоя, и ни мало наклоняся главою на землю поклонитися, и без некоего прибавления, еже инии скамейцы представляют себе, инии же ино что, и свою леность сим удобряют, и мнятся с правотрудившимися сравнятися во святых великих поклонех. [И се есть образ великих поклонов.] Паки по сих о других двоюнадесяти начинаем писати: якоже и во уставех тако глаголется, в других же легкия именуются, во иных же и малыя. Аще невежди и глаголют, такия же подобает якоже и великия, и сия творити: то не бы глаголалися. Другия или легкия, или малыя. И аще бы таковы же подобало творити, якоже и великия, то бы и молитву туюжде святаго ефрема, а не иную кратчайшую, еже есть, Боже, очисти мя грешнаго, и помилуй мя. И не осталося бы такожде написатися, якоже и великий поклон: но есть везде написан просто поклон. Поклон же именуется, елико может человек право стоя поклонитися, не падая коленми, ниже главу преклоняти до земли, и се есть образ легкаго поклона. Темже елико вас хотяй кто святых отец предания хранити, и во святей церкви благочинно управити молитву и поклоны: аще ли предстоятель, да не нерадит ни мало о сих: аще ли причетник, или людянин, да внимает, идеже написано великий поклон, да творит великий неспешно, по изглаголании святыя молитвы, со страхом божиим. А идеже просто поклон написан, то да творит просто поклон, якоже выше сего изобразися: и не вкупе с молитвою, но прежде молитву, и по молитве поклоны. И не якоже нецыи не покаряющеся святых отец преданию, ниже ведуще сами искус святых поклонов, ниже святою молитвою добре разумеют молитися, но поклонився единою нагорбився, мало восклоняяся крестяся, главою кивает, и тем своим безчинием аки чин наполняет преданных от отец поклонов: ниже молитвою умне и душевне к Богу молится, но елико время сгорбився творит суетныя своя поклоны, тако и молитву святаго ефрема, аки изумленный спешит проговорити. Такожде и вся молитвы поспешает с поклоны управити, и от тех мнимых безчестных поклонов, и от безумнаго моления своего востанет, аки юрод, ниже сам себе весть, что творил, ниже зрят на предстоятеля церкве, но ин инаго предваряет, мятутся аки тростие ветром колеблеми, не смотря лучшаго, ниже хотят научитися: но елико кто како составил свой нрав, тако и утверждается быти. Страшно, обаче реку, да не неведуще отеческаго утверждения имут под запрещения впадати, яже чтется в православную неделю святаго поста, соборное святаго седмаго вселенскаго собора сице: Вся, кроме церковнаго предания и учения и изображения святых, и приснопамятных отец, обновляемая или посем содеянная, анафема. В поклонех же и молитве будем подражательны глаголющему: ибо Бог дух есть, духом и истиною кланяющихся хощет. И божественный и верховный апостол, иже искус ведый в молитве, глаголет сице: Аще бо помолюся языком, дух мой молится, а ум мой без плода есть. Что убо есть? помолюся духом, помолюся и умом. воспою духом, воспою и умом. и паки: Хощу, рече, в церкви пять словес умом моим глаголати, нежели тьмы словес языком. И святый лествичник, воззвах, рече: поя всем сердцем моим, сиречь, телом и духом. божественный же григорий синаит глаголет: Начало умныя молитвы действо, сиречь, чистительная духа сила, и тайная ума священнодейства: конец же, изступление и восхищение ума к Богу. И святый антиох рече: молитва убо беседа есть ума к богу: такого убо требует ума ум устроения, да возможет беседовати к Богу. И паки святый лествичник: молитва есть по тоя убо творению, ссуществие и соединение человеков к богу: И паки тойже рече: Начало убо молитве прилози, единословне отгоними от начал самех. Среда же, еже во глаголемых единей быти мысли тоя же совершение восхищение к Богу. Темже мы вси, елико о святых писаний от многих малая сия слышавше вонмем, и не многословим в молитве, яко язычницы, к нимже Христос глаголет: мнят бо ся во многоглаголании своем услышани быти. И паки лествичник рече: не мудрися в молитвы твоей глаголех: детская бо многажды немования проста и не хитра, отцу их иже на небесех угодиша. Не многословити начинай, яко да не ко взысканию словес разыдется ум, едино слово мытарево бога умилостиви: един глагол верен разбойника спасе. Многословие убо в молитве многажды ум возмечта, и разлия: единословие же множицею ум собирати может, услаждаемь или поуверзаемь в слове молитвы, пребывай в нем, хранитель бо наш тогда есть моляйся с нами. темже мы с трудом, и множеством количества, яко несовершеннии молимся, второе бо первому ходатайственно: даяй бо, рече, молитву чисту без лености, молящемуся скверненне и болезненне. Ибо скверна молитве, и ино погубление и ино крадение, и другое порок. Скверна есть, еже богови предстояти, и неподобною мыслию мечтатися. Погубление есть, в попечения неполезная пленятися. Крадение есть, еже нечувстенне мысли парити. Порок есть прилог яковъ–любо тогда нам приближающся. И се зде убо о святей священней и приснопамятней умней молитве конец творим. Но да речем и о святей всем единей молитве, яже в церковном таинстве лежит, глава 82, отнележе речет священник славословие, глаголет: Миром господу помолимся. С миром да молим Господа, и да просим, кую молитву творити, якоже подобает, не вемы. и да не многословим, научает нас оным, имже подобает о молитве, и первее нраву, яко в мире подобает молитися. Что убо по славословии абие повеле да просимъ? ниже исповедающеся прежде, ниже дающе Богу благодарение: но что просятъ? да помиловани будут. Сие же прошение есть человеков осужденных и прегрешивших, иже ни един ответ имуще, или праведну вину рещи судии, испускают. сей глас, и вопиют: Господи помилуй, не от правд наших, но от человеколюбия твоего: и прочая. Таже глаголет пресвитер: о свышнем мире, и о спасении душ наших господу помолимся. священник бо помолится вкупе с людьми, и глаголет: о людие, помолимся господу, да даст мир свой нам, и спасет души наша. И отвещают людие: Господи помилуй. Посем же и прочая разумения. егда же глаголет диакон: Рцем вси: сей же глагол не ино что приносит разумети, но точию самое, еже всем вкупе молитися, не клиру точию единому, но и всем обретающимся в церкви. Таже речет диакон: И от всея души, и от всего помышления нашего рцем. Но что убо рцемъ? ничтоже убо ино, разве еже оную же общую молитву: Господи помилуй. О сей убо святей молитве священный златоуст пишет к коринфяном, во 18 нравоучении: Ибо о действуемых о иже в покаянии общия и от священника и от людей бывают молитвы: и вси едину глаголют молитву, милости исполнену, еже есть, Господи помилуй. Сего ради в служебниках пишется, людие глаголют сие, или оно, на нихже местех написася. Во святей же восточной церкви не инако творится, но тако якоже пишется. Идеже написася, людие глаголют, то вси вкупе, елицы обретаются в церкви, глаголют: или Господи помилуй, или Подай Господи, или И со духом твоим, или Отче наш: Аще у нас и не творится сего, обаче подобает творити. Ибо якоже выше речеся, егда речет диакон: Миром господу помолимся, или Рцем вси, тогда всем подобает и отвещати: Господи помилуй. Аще бы ко единому клиру глаголалося отвещати, то не бы написали: людие глаголют. Такожде и святый священный златоуст в томже нравоучении глаголет паки: Во время самых страшных таин, приветствует иерей людем: Мир вам. приветствуют и людие иерею глаголюще: И духови твоему. Ничтоже ино есть, разве сие: яже благодарения паки общая, ниже бо он сам благодарит, но и людие вси. Первее бо их прием глас: таже согласившимся яко достойно и праведно сие бывает, тогда начинает благодарения. И что чудишися, аще негде со священником людие вещают, идеже и с самыми херувимы, и с вышними силами обще священныя оны песни возсылаютъ? Сия же вся оная речена быша, да кождо и от начинаемых трезвится в поучении сем: да увемы, яко тело есмы вси едино, толико имуще друг ко другу различие, елико уд ко удом. и не все на священники возверзем, но и сами якоже о общем теле, о церкви всей тако да печалуем. Сие бо утверждение большее и нам и вам преподает множайшия устрояти добродетели: даже проходящии сия, получим милость божию зде, и в будущем веце царство небесное, о Христе Иисусе господе нашем: яко тому подобает слава, со отцем, и святым духом, во веки, аминь.