Псалтирь и каноны, чтомые по усопшим

² Боже, Боже мой, вонми ми, вскую оставил мя еси? Далече от спасения моего словеса грехопадений моих. ³Боже мой, воззову во дни, и не услышиши, и в нощи, и не в безумие мне. ⁴Ты же во Святем живеши, хвало Израилева. ⁵На Тя уповаша отцы наши: уповаша, и избавил еси я: ⁶ к Тебе воззваша, и спасошася: на Тя уповаша, и не постыдешася. ⁷ Аз же есмь червь, а не человек, поношение человеков и уничижение людей. ⁸Вси видящии мя поругаша ми ся, глаголаша устнами, покиваша главою: ⁹ упова на Господа, да избавит его, да спасет его, яко хощет его. ¹⁰Яко Ты еси исторгий мя из чрева, упование мое от сосцу матере моея. ¹¹К Тебе привержен есмь от ложесн, от чрева матере моея Бог мой еси Ты. ¹² Да не отступиши от мене, яко скорбь близ, яко несть помогаяй ми. ¹³Обыдоша мя тельцы мнози, юнцы тучнии одержаша мя: ¹⁴ отверзоша на мя уста Своя, яко лев восхищаяй и рыкаяй. ¹⁵ Яко вода излияхся, и разсыпашася вся кости моя, бысть сердце мое яко воск таяй посреде чрева моего. ¹⁶Изсше яко скудель крепость моя, и язык мой прильпе гортани моему, и в персть смерти свел мя еси. ¹⁷Яко обыдоша мя пси мнози, сонм лукавых одержаша мя: ископаша руце мои и нозе мои. ¹⁸Исчетоша вся кости моя: тии же смотриша и презреша мя. ¹⁹Разделиша ризы моя себе, и о одежди моей меташа жребий. ²⁰Ты же, Господи, не удали помощь Твою от мене: на заступление мое вонми. ²¹Избави от оружия душу мою, и из руки песии единородную мою. ²²Спаси мя от уст львовых и от рог единорожь смирение мое. Повем имя Твое братии моей, посреде церкве воспою Тя. ²⁴Боящиися Господа, восхвалите Его, все семя Иаковле, прославите Его, да убоится же от Него все семя Израилево. ²⁵ Яко не уничижи, ниже негодова молитвы нищаго, ниже отврати лице Свое от мене, и егда воззвах к Hему, услыша мя. ²⁶От Тебе похвала моя, в церкви велицей исповемся Тебе: молитвы моя воздам пред боящимися Его. ²⁷Ядят убозии и насытятся, и восхвалят Господа взыскающии Его: жива будут сердца их в век века. ²⁸Помянутся и обратятся ко Господу вси концы земли, и поклонятся пред Ним вся отечествия язык: ²⁹ яко Господне есть царствие, и Той обладает языки. ³⁰Ядоша и поклонишася вси тучнии земли: пред Ним припадут вси низходящии в землю: и душа моя тому живет. ³¹И семя мое поработает Ему: возвестит Господеви род грядущий: ³² и возвестят правду Его людем рождшимся, яже сотвори Господь.

Псалом Давиду, 22.

¹ Господь пасет мя, и ничтоже мя лишит. ² На месте злачне, тамо всели мя, на воде покойне воспита мя. ³Душу мою обрати, настави мя на стези правды, имене ради Своего. ⁴Аще бо и пойду посреде сени смертныя, не убоюся зла, яко Ты со мною еси: жезл Твой и палица Твоя, та мя утешиста. ⁵Уготовал еси предо мною трапезу сопротив стужающим мне: умастил еси елеом главу мою, и чаша Твоя упоявающи мя, яко державна. ⁶И милость Твоя поженет мя вся дни живота моего, и еже вселити ми ся в дом Господень в долготу дний.

Псалом Давиду, единыя от суббот, 23.

¹ Господня земля, и исполнение ея, вселенная и вси живущии на ней. ²Той на морях основал ю есть и на реках уготовал ю есть. ³Кто взыдет на гору Господню? или кто станет на месте святем Его? 4Неповинен рукама и чист сердцем, иже не прият всуе душу свою и не клятся лестию искреннему своему. ⁵Сей приимет благословение от Господа и милостыню от Бога, Спаса своего. ⁶Сей род ищущих Господа, ищущих лице Бога Иаковля. ⁷Возмите врата князи ваша, и возмитеся врата вечная: и внидет Царь славы. ⁸Кто есть сей Царь славы? Господь крепок и силен, Господь силен в брани. ⁹ Возмите врата князи ваша, и возмитеся врата вечная: и внидет Царь славы. ¹⁰ Кто есть сей Царь славы? Господь сил, Той есть Царь славы.

Слава Отцу и Сыну и Святому Духу, и ныне и присно и во веки веков, аминь.

Аллилуия, аллилуия, аллилуия, слава Тебе, Боже (трижды).

Господи, помилуй (трижды).

Слава Отцу и Сыну и Святому Духу.

Покой, Господи, душу усопшаго раба Твоего (имярек) (поклон), и елико в житии сем яко человек согреши, Ты же, яко Человеколюбец

Бог, прости его и помилуй (поклон), вечныя муки избави (поклон), Небесному Царствию причастника учини (поклон) и душам нашим полезная сотвори (поклон).

И ныне и присно и во веки веков, аминь.

(До погребения тропари и молитву после кафисмы не читают, а переходят к следующей кафисме.)

По 3-й кафисме:

Трисвятое по Отче наш.

Тропари, глас 3-й: Живущи на земли, душе моя, покайся: персть во гробе не поет, прегрешений не избавляет. Возопий Христу Богу:

Сердцеведче, согреших, прежде даже не осудиши мя, помилуй мя.

Доколе, душе моя, пребываеши в прегрешениих? Доколе приемлеши покаяния преложение? Приими во уме суд грядущий и возопий Господу: Сердцеведче, согреших, прежде даже не осудиши мя, помилуй мя.